તેહરાન/વોશિંગ્ટન, નવી દિલ્હી, 22 જુલાઈ (હિ.સ.). અમેરિકાએ સતત 11મી રાત ઈરાનના સૈન્ય ઠેકાણાઓ પર બોમ્બમારો કર્યો છે. અમેરિકી મધ્ય કમાન (સેન્ટકોમ)નું કહેવું છે કે, આ હુમલાઓનો ઉદ્દેશ્ય હોર્મુઝ જળસંધિમાં વ્યાપારી જહાજો માટે ખતરો ઉભો કરવાની ઈરાનની ક્ષમતાને નબળી પાડવાનો છે. સેન્ટકોમે એક્સ પર લખ્યું, સ્થાનિક સમય અનુસાર આજે સાંજે 7 વાગ્યે (પૂર્વીય સમય) ઈરાનના સૈન્ય ઠેકાણાઓ પર હુમલો શરૂ કર્યો. આ સતત 11મી રાત છે. અમેરિકી હુમલાઓની તાજી શૃંખલાને જોતા તેહરાનમાં વાયુ સંરક્ષણ પ્રણાલી (એર ડિફેન્સ સિસ્ટમ) સક્રિય કરવામાં આવી છે.

સીએનએન, અલ જઝીરા, એબીસી ન્યૂઝ અને સીબીએસ ન્યૂઝના અહેવાલ અનુસાર, અમેરિકી હુમલાને જોતા ઈરાને રાજધાની તેહરાનના ઘણા વિસ્તારોમાં એર ડિફેન્સ સિસ્ટમને સક્રિય કરી છે. ઈરાનની સરકારી પ્રસારક સંસ્થા આઈઆરઆઈબી અનુસાર, તેહરાનના પશ્ચિમ, પૂર્વ અને ઉત્તર-પૂર્વીય વિસ્તારોમાં ધમાકાનો અવાજ સંભળાયો. સેન્ટકોમે કહ્યું, છેલ્લા ત્રણ મહિનામાં ઈરાને પ્રાદેશિક અને વૈશ્વિક વેપાર માટે મહત્વપૂર્ણ આંતરરાષ્ટ્રીય જળમાર્ગમાંથી પસાર થતા 30થી વધુ વ્યાપારી જહાજો પર હુમલો કર્યો છે. કારણ વગર કરાયેલા હુમલાઓએ સેંકડો નિર્દોષ નાવિકોના જીવ જોખમમાં મૂક્યા છે અને નેવિગેશનની સ્વતંત્રતાને નબળી પાડી છે.

આ દરમિયાન કતરના વડાપ્રધાન અને વિદેશમંત્રી શેખ મોહમ્મદ બિન અબ્દુલરહમાન બિન જાસિમ અલ થાનીએ સાઉદી અરબના વિદેશમંત્રી ફૈસલ બિન ફરહાન બિન અબ્દુલ્લા અલ સઉદ સાથે ટેલિફોન પર વાતચીત કરી હોવાનું જણાવાયું છે. કતરના વિદેશ મંત્રાલયના નિવેદન અનુસાર, બંને નેતાઓએ તણાવ ઓછો કરવા, પ્રાદેશિક સુરક્ષા અને સ્થિરતાને મજબૂત કરવા માટે રાજદ્વારી પ્રયાસોને તેજ કરવા તથા પરસ્પર સંકલન વધારવા પર ચર્ચા કરી. શેખ મોહમ્મદે ભારપૂર્વક જણાવ્યું કે, તમામ પક્ષો રાજદ્વારીતા પ્રત્યે પ્રતિબદ્ધ રહે. અમેરિકા તથા ઈરાન વચ્ચે થયેલા સમજૂતી કરારમાં સહમત જોગવાઈઓને લાગુ કરાવવા માટે પ્રયાસ કરે. અમેરિકા-ઈરાન યુદ્ધની ગુંજ અમેરિકી સેનેટમાં થઈ છે. યુદ્ધ સચિવ પીટ હેગસેથને કોંગ્રેસની સુનાવણી દરમિયાન ઈરાન સંબંધિત સૈન્ય અભિયાન અને તેના પર થતા ખર્ચને લઈને વિપક્ષના તીખા સવાલોનો સામનો કરવો પડ્યો.

મહત્વપૂર્ણ એ છે કે, અમેરિકા અને ઇઝરાયલે 28 ફેબ્રુઆરીના રોજ ઈરાન વિરુદ્ધ સંકલિત હુમલા શરૂ કર્યા. પહેલા જ દિવસે ઈરાનના સર્વોચ્ચ નેતા અલી ખામેનેઈ, તેમના પરિવારના ઘણા સભ્યો અને વરિષ્ઠ કમાન્ડર માર્યા ગયા. આ દરમિયાન સમાધાનના પ્રયાસો પણ થયા. જૂનમાં અમેરિકા અને ઈરાનના પ્રતિનિધિમંડળોએ વાતચીત શરૂ કરી. યુદ્ધવિરામ પણ થયો. તેમ છતાં અમેરિકા અને ઈરાન વચ્ચે હુમલા ચાલુ રહ્યા. ત્યારથી હોર્મુઝ જળસંધિ જ મુખ્ય તણાવના કેન્દ્રમાં છે.

અમેરિકી સંરક્ષણ મુખ્યાલય પેન્ટાગોને ગયા અઠવાડિયે જોર્ડનના એર બેઝ પર થયેલા હુમલામાં માર્યા ગયેલા ત્રીજા સૈનિકની ઓળખ કરી લીધી છે. સંરક્ષણ વિભાગે નિવેદનમાં કહ્યું, એવું માનવામાં આવે છે કે ન્યૂયોર્કના ઓઝોન પાર્કના 28 વર્ષીય સાર્જન્ટ એન્જલ એસ. રામપ્રસાદનું મૃત્યુ 17 જુલાઈના રોજ જોર્ડનના મુવાફક સાલ્ટી એર બેઝ પર ઈરાનના હુમલા દરમિયાન થયું હતું. ઘટનાની તપાસ ચાલી રહી છે. સેન્ટકોમે પહેલા આ સૈનિકને ગુમ જાહેર કર્યો હતો. વિભાગે કહ્યું કે, આ હુમલામાં ટેક્સાસના કેરોલટનની 19 વર્ષની ઇસાબેલા ગોન્ઝાલેસ અને હવાઈના એવા બીચના 25 વર્ષીય ફર્સ્ટ લેફ્ટનન્ટ ટાયલર ફીહાનનું પણ મૃત્યુ થયું હતું.

સંરક્ષણ વિભાગે ઇરાકમાં માર્યા ગયેલા એક સર્વિસ મેમ્બરની પણ ઓળખ કરી છે. આ સાથે જ યુદ્ધ શરૂ થયા પછી માર્યા ગયેલા અમેરિકી સૈનિકોની કુલ સંખ્યા 18 થઈ ગઈ છે. અમેરિકી અધિકારીઓએ જણાવ્યું કે આ મહિને ઈરાની હુમલાઓમાં લગભગ 100 અમેરિકી સર્વિસ મેમ્બર ઘાયલ થયા છે. રાષ્ટ્રપતિ ડોનાલ્ડ ટ્રમ્પ બુધવારે તે અમેરિકી સૈનિકોના સન્માનજનક હસ્તાંતરણ સમારોહમાં સામેલ થશે જેઓ તાજેતરના દિવસોમાં ઈરાનના હુમલાઓમાં માર્યા ગયા છે. સમારોહ ડેલાવેરમાં ડોવર એર ફોર્સ બેઝ પર સવારે 11 વાગ્યે યોજાશે.

બીજી તરફ, ઈરાન પણ સંપૂર્ણપણે આક્રમક છે. કુવૈતે કહ્યું કે, તે ઈરાની ડ્રોન હુમલાઓથી બચાવ કરી રહ્યું છે. એર ડિફેન્સ સિસ્ટમ હુમલાઓને રોકી રહી છે. ઈરાનની સરકારી ન્યૂઝ એજન્સી ફાર્સે કહ્યું કે, કુવૈતના અલી અલ સલેમ બેઝને નિશાન બનાવવામાં આવ્યો છે. ત્યાં અમેરિકી સૈનિકો તૈનાત છે.

હિન્દુસ્થાન સમાચાર / મુકુન્દ

હિન્દુસ્થાન સમાચાર / ડો.હિતેશ એન.વ્યાસ