પાટણ, 30 ઓગસ્ટ (હિ.સ.)પાટણ જિલ્લાના રાધનપુરમાં LCB ટીમે અરજણસર ગામ નજીક પાલનપુર-રાધનપુર નેશનલ હાઇવે પરથી દારૂ ભરેલી પિકઅપ ગાડી ઝડપી પાડી હતી. GJ-18-AZ-6913 નંબરની ગાડીમાંથી વિદેશી દારૂ અને બીયરની કુલ 1,272 બોટલ-ટીન મળી આવી હતી.

પોલીસને દારૂની હેરાફેરી અંગે બાતમી મળતા અરજણસર નજીક વોચ ગોઠવવામાં આવી હતી. શંકાસ્પદ પિકઅપને રોકી તલાશી લેતા પાસ-પરમિટ વગરનો ભારતીય બનાવટનો વિદેશી દારૂ અને બીયરનો જથ્થો મળી આવ્યો હતો.

જપ્ત કરાયેલા દારૂની કિંમત રૂ. 3,38,400 જ્યારે હેરાફેરીમાં વપરાયેલી પિકઅપની કિંમત રૂ. 7 લાખ આંકવામાં આવી છે. આમ, પોલીસે કુલ રૂ. 10,38,400નો મુદ્દામાલ જપ્ત કર્યો છે.

આ મામલે પિકઅપ ચાલક વિરુદ્ધ પ્રોહિબિશન એક્ટ હેઠળ ગુનો નોંધી કાયદેસરની કાર્યવાહી હાથ ધરવામાં આવી છે. દારૂના રેકેટમાં સામેલ અન્ય આરોપીઓને ઝડપી પાડવા માટે LCBની વધુ તપાસ ચાલુ છે.

હિન્દુસ્થાન સમાચાર / હાર્દિક રાઠોડ