નવી દિલ્હી, 06 ઓગસ્ટ (હિ.સ.). હોકી ઇન્ડિયાએ ગુરુવારે એએચએફ જુનિયર એશિયા કપ-2026 માટે, ભારતીય જુનિયર મહિલા હોકી ટીમની જાહેરાત કરી દીધી છે. આ ટુર્નામેન્ટ 30 ઓગસ્ટથી 13 સપ્ટેમ્બર સુધી ચીનના મોકીમાં રમાશે. ટીમમાં 18 ખેલાડીઓને સામેલ કરવામાં આવ્યા છે, જ્યારે બે ખેલાડીઓને વૈકલ્પિક (અલ્ટરનેટ) તરીકે રાખવામાં આવ્યા છે.

ટીમની કપ્તાની મિડફિલ્ડર ખૈદેમ શિલેઇમા ચાનુ કરશે. મુખ્ય કોચ ટિમ વ્હાઇટના માર્ગદર્શન હેઠળ ટીમે છેલ્લા કેટલાક મહિનાઓથી સઘન તૈયારી કરી છે. આ વર્ષે ટીમની કમાન સંભાળનાર વ્હાઇટની દેખરેખ હેઠળ ખેલાડીઓએ પોતાની રમતમાં સતત સુધારો કર્યો છે. ખંડીય ટુર્નામેન્ટની તૈયારીના ભાગરૂપે ભારતીય જુનિયર મહિલા ટીમ તાજેતરમાં યુનાઇટેડ કિંગડમના એક્સપોઝર પ્રવાસ પરથી પરત ફરી છે. આ પ્રવાસમાં ખેલાડીઓને આંતરરાષ્ટ્રીય મેચોનો અનુભવ મળ્યો, જેનાથી જુનિયર એશિયા કપની તૈયારીઓને વધુ મજબૂતી મળી.

કોચ ટિમ વ્હાઇટે ટીમની જાહેરાત પર કહ્યું, મને ગર્વ છે કે આ યુવા ખેલાડીઓએ સખત મહેનત, સમર્પણ અને દ્રઢ સંકલ્પના જોરે ટીમમાં સ્થાન બનાવ્યું છે. છેલ્લા કેટલાક મહિનાઓમાં તેમણે પોતાની રમતના દરેક પાસામાં સુધારા માટે અથાક મહેનત કરી છે અને મેં તેમને વ્યક્તિગત અને ટીમ બંને સ્વરૂપોમાં આગળ વધતા જોયા છે.

તેમણે આગળ કહ્યું, આ ટુર્નામેન્ટ એશિયાની શ્રેષ્ઠ ટીમો સામે પોતાને ચકાસવા અને મોટા લક્ષ્યો તરફ આગળ વધવાની એક મહત્વપૂર્ણ તક છે. અમે દરેક મેચમાં આત્મવિશ્વાસ અને અનુશાસન સાથે ઉતરીશું. મને વિશ્વાસ છે કે આ ટીમમાં દેશને ગૌરવ અપાવવાની પ્રતિભા અને જુસ્સો છે.

ટુર્નામેન્ટમાં એશિયાની ટોચની જુનિયર ટીમો ભાગ લેશે. સ્પર્ધાનો કાર્યક્રમ અને પૂલની જાહેરાત બાદમાં કરવામાં આવશે.

ભારતીય ટીમ:

ગોલકીપર: નિધિ, એંગિલ હર્ષા રાણી મિન્ઝ

ડિફેન્ડર: પૂજા સાહુ, સુપ્રિયા, પૂજા મલિક, પાર્વતી ટોપનો, મધુ

મિડફિલ્ડર: ખૈદેમ શિલેઇમા ચાનુ (કેપ્ટન), તનુજા ટોપ્પો, બિનીમા ધન, રોશની ઐંદ, ગીતા યાદવ

ફોરવર્ડ: લાલરિનપુઈ, પૂર્ણિમા યાદવ, સુખવીર કૌર, કૃષ્ણા શર્મા, સાનિકા ચંદ્રકાંત માને, મધુ સિદાર

વૈકલ્પિક ખેલાડીઓ: એફ. લાલબિયાક્સિયામી, તનુશ્રી દિનેશ કડુ.

હિન્દુસ્થાન સમાચાર / સુનીલ દુબે / સુનીત નિગમ

હિન્દુસ્થાન સમાચાર / માધવી વ્યાસ