-52 દેશોના પ્રતિનિધિઓ સહિત 600થી વધુ કંપનીઓ ભાગ લેશે.

નવી દિલ્હી, 16 સપ્ટેમ્બર (હિ.સ.) વડાપ્રધાન નરેન્દ્ર મોદી ગુરુવારે નવી દિલ્હી સ્થિત યશોભૂમિમાં સવારે લગભગ 10 વાગ્યે ત્રણ દિવસીય આંતરરાષ્ટ્રીય સંમેલન અને પ્રદર્શન ‘સેમીકોન ઇન્ડિયા 2026’નું ઉદ્ઘાટન કરશે. આ પ્રસંગે વડાપ્રધાન ઉપસ્થિત જનસમૂહને સંબોધિત પણ કરશે. 17 થી 19 સપ્ટેમ્બર દરમિયાન આયોજિત થનારા સંમેલનની થીમ ‘સિલિકોનથી સિસ્ટમ્સ સુધી: ઇકોસિસ્ટમનું નિર્માણ’ છે.

વડાપ્રધાન કાર્યાલય (પીએમઓ) અનુસાર, સંમેલનમાં સેમિકન્ડક્ટર અને ઇલેક્ટ્રોનિક્સ મૂલ્ય શૃંખલા સાથે સંકળાયેલા વૈશ્વિક અને ભારતીય ઉદ્યોગોની સાથે નીતિ નિર્માતાઓ, રોકાણકારો, સંશોધકો, નવા સાહસો, શૈક્ષણિક સંસ્થાઓ અને વિદ્યાર્થીઓ એક સામાન્ય મંચ પર એકઠા થશે. આયોજનનો ઉદ્દેશ્ય ભારતમાં સહયોગ, રોકાણ અને નવીનતાને પ્રોત્સાહન આપવાની સાથે સેમિકન્ડક્ટર ક્ષેત્ર માટે કુશળ કાર્યબળના વિકાસને ગતિ આપવાનો છે.

સંમેલનમાં સેમિકન્ડક્ટર ક્ષેત્રની સાથે-સાથે ડિસ્પ્લે ઉદ્યોગમાં તકનીકી પ્રગતિ પર સમાંતર સત્રોનું આયોજન કરવામાં આવશે. વ્યૂહાત્મક ભાગીદારી અને સંયુક્ત સાહસોને પ્રોત્સાહન આપવા માટે છ દેશોની ગોળમેજી પરિષદો યોજાશે. આ ઉપરાંત મહિલા નેતૃત્વ પર કેન્દ્રિત વિશેષ સત્ર પણ આયોજિત કરવામાં આવશે.

‘સેમીકોન ઇન્ડિયા 2026’માં સેમિકન્ડક્ટર મૂલ્ય શૃંખલાના તમામ મુખ્ય તબક્કાઓને સંકલિત સ્વરૂપમાં પ્રદર્શિત કરવામાં આવશે. આમાં સેમિકન્ડક્ટર સામગ્રી અને ઉપકરણોથી લઈને ચિપ ડિઝાઇન, ફેબ્રિકેશન, અદ્યતન પેકેજિંગ, ઇલેક્ટ્રોનિક્સ અને સંકલિત પ્રણાલીઓ સુધીની સંપૂર્ણ પ્રક્રિયા શામેલ હશે. આ સંપૂર્ણ યાત્રાને પ્રદર્શિત કરવા માટે વિશેષ ‘રેતીથી સિલિકોનથી સિસ્ટમ્સ સુધી’ મૂલ્ય શૃંખલા અનુભવ કેન્દ્ર તૈયાર કરવામાં આવ્યું છે.

આયોજકો અનુસાર, સંમેલનમાં 52 દેશોના પ્રતિનિધિઓ સહિત 600થી વધુ કંપનીઓ ભાગ લેશે. આયોજન દરમિયાન લગભગ 50 હજાર મુલાકાતીઓ પહોંચવાની સંભાવના છે. આ ઉપરાંત 400થી વધુ ટોચના કાર્યકારીઓ અને 150થી વધુ વક્તાઓ વિવિધ તકનીકી અને વ્યૂહાત્મક સત્રોમાં પોતાના વિચારો રજૂ કરશે.

પ્રદર્શનમાં જાપાન, દક્ષિણ કોરિયા, મલેશિયા, નેધરલેન્ડ્સ, સિંગાપોર અને સ્વીડનના વિશેષ દેશ મંડપ બનાવવામાં આવ્યા છે. આ ઉપરાંત 12 રાજ્યોના બૂથ, નવા સાહસોના મંડપ, નવીનતા પ્રદર્શન, વિદ્યાર્થી હેકાથોન અને કાર્યબળ વિકાસ મંડપ પણ સંમેલનનો ભાગ હશે.

હિન્દુસ્થાન સમાચાર / પ્રશાંત શેખર / ઉદય કુમાર સિંહ

હિન્દુસ્થાન સમાચાર / ડો.હિતેશ એન.વ્યાસ