-નારકેલડાંગા, નેતાજીનગર અને રવીન્દ્ર સરોવરમાં તલાશી

કોલકતા, નવી દિલ્હી, 16 સપ્ટેમ્બર (હિ.સ.). ચિટફંડ સાથે સંકળાયેલા કથિત નાણાકીય કૌભાંડની તપાસના સંબંધમાં પ્રવર્તન નિર્દેશાલય (ઇડી) એ, બુધવારે સવારે કોલકતાના અનેક વિસ્તારોમાં એકસાથે તલાશી અભિયાન ચલાવ્યું. પ્રાથમિક માહિતી અનુસાર, શહેરમાં ઓછામાં ઓછા છ ઠેકાણાં પર ઇડીની ટીમો પહોંચી. કાર્યવાહી દરમિયાન સુરક્ષા માટે કેન્દ્રીય સશસ્ત્ર દળોના જવાનો પણ તૈનાત રહ્યા.

સત્તાવાર માહિતી અનુસાર, ઇડીની એક ટીમ સવારે લગભગ સાત વાગ્યે ઉત્તર કોલકાતાના નારકેલડાંગા વિસ્તારમાં એક વેપારીના નિવાસસ્થાને પહોંચી. વેપારીનું નામ અબ્દુર જબ્બાર મોલ્લા જણાવવામાં આવ્યું છે. તપાસ કથિત રીતે ચિટફંડ દ્વારા એકત્ર કરાયેલી રકમ અને તેના વિવિધ વ્યવસાયોમાં ઉપયોગ સાથે સંબંધિત છે. જોકે, આ આરોપોની અંતિમ પુષ્ટિ તપાસ પૂર્ણ થયા પછી જ થઈ શકશે.

ઇડી સૂત્રોના હવાલાથી મળેલી માહિતી અનુસાર, તપાસનો સંબંધ એપીએમ નામના ચિટફંડ અથવા રોકાણ નેટવર્ક સાથે જણાવવામાં આવી રહ્યો છે. એજન્સી એ શોધવામાં વ્યસ્ત છે કે રોકાણકારો પાસેથી એકત્ર કરાયેલી રકમ ક્યાં મોકલવામાં આવી અને શું તેને અન્ય વ્યવસાયો, નિર્માણ અથવા રિયલ એસ્ટેટ સંબંધિત કાર્યો દ્વારા રોકાણ અથવા સ્થાનાંતરિત કરવામાં આવી.

નારકેલડાંગા ઉપરાંત નેતાજીનગર અને રવીન્દ્ર સરોવર વિસ્તારમાં પણ ઇડીની ટીમો પહોંચી. નેતાજીનગરમાં અબ્દુર જબ્બાર મોલ્લા સાથે કથિત રીતે સંકળાયેલા એક વ્યક્તિના નિવાસસ્થાને પણ તલાશી લેવામાં આવી. તપાસકર્તાઓએ સંબંધિત લોકોના નાણાકીય વ્યવહારો, દસ્તાવેજો અને અન્ય રેકોર્ડની તપાસ કરી.

ઇડીની આ કાર્યવાહી કોલકતા પૂરતી જ મર્યાદિત ન રહી, મધ્યપ્રદેશના ઇન્દોરમાં પણ ઇડીની ટીમે અનેક જગ્યાએ દરોડા પાડ્યા. સૂત્રો અનુસાર કુલ 17 ઠેકાણાં પર તલાશીની માહિતી પણ સામે આવી છે.

ઇડીની કાર્યવાહીનો ઉદ્દેશ્ય કથિત ચિટફંડમાંથી એકત્ર કરાયેલી રકમના વ્યવહારો, તેના રોકાણ અને સંભવિત મની લોન્ડરિંગના માર્ગો શોધવાનો જણાવવામાં આવી રહ્યો છે. હાલમાં તલાશી દરમિયાન કયા-કયા દસ્તાવેજો અથવા અન્ય સામગ્રી મળી છે, તેની ઇડી તરફથી વિસ્તૃત સત્તાવાર માહિતી સામે આવી નથી.

હિન્દુસ્થાન સમાચાર / સંતોષ વિશ્વકર્મા / સંતોષ મધુપ / ઉદય કુમાર સિંહ

હિન્દુસ્થાન સમાચાર / માધવી વ્યાસ