દેહરાદૂન, નવી દિલ્હી, 26 સપ્ટેમ્બર (હિ.સ.). ઉત્તરાખંડમાં હવામાન વિભાગના રેડ એલર્ટ અને ખરાબ હવામાનને ધ્યાનમાં રાખીને તીર્થયાત્રીઓની સુરક્ષા માટે ચારધામ યાત્રા શનિવાર બપોરથી 27 સપ્ટેમ્બર સુધી સ્થગિત કરી દેવામાં આવી છે. ચારધામ યાત્રા વ્યવસ્થાપન અને નિયંત્રણ સંગઠનના કમિશનર આનંદ સ્વરૂપે ગઢવાલ મંડળના તમામ જિલ્લા મેજિસ્ટ્રેટોને યાત્રા સ્થગિત કરવા અંગે જરૂરી નિર્દેશો જારી કર્યા છે.

હવામાન વિજ્ઞાન કેન્દ્ર પાસેથી 26 સપ્ટેમ્બરના રોજ મળેલી માહિતી અને રાજ્ય કટોકટી સંચાલન કેન્દ્ર (એસઈઓસી)ની આગાહીમાં રેડ એલર્ટ જારી કરાયા બાદ આ નિર્ણય લેવામાં આવ્યો છે. આદેશમાં જણાવાયું છે કે, દેશ-વિદેશથી ચારધામ દર્શન માટે આવતા શ્રદ્ધાળુઓ અને યાત્રીઓની સુરક્ષા સર્વોચ્ચ પ્રાથમિકતા છે.

જિલ્લા મેજિસ્ટ્રેટોને પોતપોતાના જિલ્લાઓમાં યાત્રા સ્થગિત કરવાના આદેશનું કડકપણે પાલન સુનિશ્ચિત કરવા અને યાત્રા માર્ગો પર જરૂરી સુરક્ષા વ્યવસ્થા જાળવી રાખવાના નિર્દેશો આપવામાં આવ્યા છે. હવામાન સામાન્ય થયા બાદ યાત્રા ફરી શરૂ કરવા માટે જરૂરી વ્યવસ્થા સુનિશ્ચિત કરવા પણ જણાવાયું છે. સાથે જ, આગામી આદેશ સુધી યાત્રા નોંધણી સ્થગિત રાખવા અંગે જરૂરી કાર્યવાહીના નિર્દેશો આપવામાં આવ્યા છે.

રુદ્રપ્રયાગ જિલ્લા પ્રશાસને પણ રેડ એલર્ટને ધ્યાનમાં રાખીને કેદારનાથ ધામ યાત્રા 26 સપ્ટેમ્બર બપોરથી 27 સપ્ટેમ્બર સુધી સ્થગિત કરી દીધી છે. જિલ્લા મેજિસ્ટ્રેટ અને જિલ્લા આપત્તિ વ્યવસ્થાપન પ્રાધિકરણના અધ્યક્ષ વિશાલ મિશ્રાએ જણાવ્યું કે શ્રદ્ધાળુઓની સુરક્ષાને ધ્યાનમાં રાખીને આ નિર્ણય લેવામાં આવ્યો છે.

તેમણે યાત્રા માર્ગના તમામ સેક્ટર અધિકારીઓ, તપાસ ચોકીઓ અને સેક્ટર મેજિસ્ટ્રેટોને આદેશનું કડકપણે પાલન સુનિશ્ચિત કરવાના નિર્દેશો આપ્યા છે. પ્રશાસન દ્વારા હવામાનની સ્થિતિ પર સતત નજર રાખવામાં આવી રહી છે.

અધિકારીઓના મતે, હવામાનમાં સુધારો અને પરિસ્થિતિઓ અનુકૂળ થયા બાદ ચારધામ યાત્રા ફરી શરૂ કરવા અંગે નિર્ણય લેવામાં આવશે. પ્રશાસને શ્રદ્ધાળુઓને હવામાન વિભાગની ચેતવણીઓ અને સ્થાનિક પ્રશાસનના નિર્દેશોનું પાલન કરવા અપીલ કરી છે.

હિન્દુસ્થાન સમાચાર / રાજેશ કુમાર પાંડેય / ઉદય કુમાર સિંહ

હિન્દુસ્થાન સમાચાર / માધવી વ્યાસ