અમરેલી, 1 ઓક્ટોબર (હિ.સ.) અમરેલી જિલ્લો ફરી એકવાર સિંહોના સામ્રાજ્ય તરીકે ચમક્યો છે. વરસાદી માહોલ વચ્ચે સાવરકુંડલાના વીજપડી પંથકમાં 10 સિંહનું ટોળું જોવા મળ્યું છે. આ દૃશ્યો કેમેરામાં કેદ થતાં લોકોમાં ભારે ઉત્સાહ જોવા મળી રહ્યો છે.

પ્રાપ્ત વિગતો મુજબ આ ટોળામાં આશરે 6 સિંહણ અને 4 સિંહબાળ સામેલ છે. વરસાદી વાતાવરણમાં લીલીછમ હરિયાળી વચ્ચે આ સિંહો આરામ કરતા જોવા મળ્યા હતા. બચ્ચાંઓ સાથે સિંહણોના રમુજી પળોના દ્રશ્યો કેમેરામાં કેદ થતા સોશિયલ મીડિયા પર વાયરલ થઈ ગયા છે.

લાંબા સમયથી સિંહના ટોળા હવે જોવા મળતા નથી એવી કહેવત ચાલી આવતી હતી, પરંતુ આ ઘટના ફરીથી સાબિત કરે છે કે અમરેલી જિલ્લો હજી પણ સિંહોના રાજ્ય તરીકે જીવંત છે. ખાસ કરીને વીજપડી પંથકના જંગલ અને ચરોતર પ્રદેશોમાં સિંહોની સતત હાજરી પ્રકૃતિ પ્રેમીઓ માટે આનંદનો વિષય છે.

સ્થાનિક ગ્રામજનો જણાવે છે કે આ વિસ્તારમાં સિંહો વારંવાર ચરાઈના મેદાનો અને પાણીના કૂવા આસપાસ દેખાતા રહે છે. સિંહબાળના રમતા દ્રશ્યો જોઈને ગામલોકો કહે છે કે પ્રકૃતિએ આ વર્ષે વરસાદ સાથે સિંહોના નજારા ભેટ આપ્યા છે.

વન વિભાગના અધિકારીઓએ જણાવ્યું છે કે આ ટોળું આરોગ્યપ્રદ અને સલામત છે. સિંહણો સાથેના નાનકડા બચ્ચાંઓ કુદરતી પર્યાવરણમાં સારી રીતે વિકસતા હોય તેવું જણાઈ રહ્યું છે.

આ દૃશ્યો માત્ર અમરેલી જ નહીં પરંતુ સમગ્ર સૌરાષ્ટ્ર માટે ગૌરવની વાત છે, કારણ કે સિંહોનું અસ્તિત્વ અહીંની જૈવવિવિધતા અને કુદરતી વારસાને અનોખી ઓળખ આપે છે. વરસાદી માહોલમાં 10 સિંહોનો આ નજારો લોકો માટે અવિસ્મરણીય બની રહ્યો છે.

હિન્દુસ્થાન સમાચાર / Gondaliya Abhishek Nandrambhai