વડોદરા,13 ઓકટોબર (હિ.સ.) વડોદરા શહેરમાં એક નિવૃત્ત પીએસઆઈએ નશો કરેલી હાલતમાં કાર ચલાવી અકસ્માત સર્જતાં પોલીસે ગુનો ડાખ કર્યો. અકસ્માત બાદ જ્યારે લોકોએ તેને રોક્યો ત્યારે તેને નફ્ફટાઈથી કહ્યું હતું કે આગળ જેને ગાડી ઠોકી હતી તેને 10 હજાર આપી ચૂક્યો છું. હવે મારી પાસે પૈસા નથી કાલે આપી દઈશ. અકોટા વિસ્તારમાંથી પસાર થઈ રહેલા રિટાયર્ડ પોલીસ અધિકારી દ્વારા અકસ્માત સર્જ્યા બાદ રસ્તા પર લોકો સાથે બફાટ કરી રહ્યાના વીડિયો સોશિયલ મીડિયામાં વાઈરલ થયો છે. અકસ્માતની ઘટનાના પગલે દોડી આવેલી પોલીસે અકસ્માત સર્જનાર નિવૃત્ત પોલીસ અધિકારીને ઝડપી વધુ કાર્યવાહી હાથ ધરી છે.

વડોદરા શહેરના અકોટા ગાર્ડન ચાર રસ્તા પાસેથી ફોર-વ્હીલર લઈને નવાપુરા પોલીસ મથકના નિવૃત્ત પીએસઆઈ ધીરજ પરમાર પસાર થઈ રહ્યા હતા. એ દરમિયાન તેમણે આગળ ચાલી રહેલા મોપેડને અડફેટમાં લેતાં માતા અને પુત્ર રોડ ઉપર પટકાયાં હતાં. આ સમય મહિલા સારિકા સુનવણીને ઈજાઓ પહોંચી હતી, જેથી તેમને હોસ્પિટલમાં દાખલ કરવામાં આવ્યાં હતાં.

બીજી તરફ સ્થળ પર હાજર રાહદારીઓએ નિવૃત્ત પોલીસકર્મીને ઊભો રાખ્યો હતો, જોકે તેઓ નશાની હાલતમાં હોવાનું લોકોના ધ્યાને આવતાં તેમણે ઘટનાની જાણ પોલીસ મથકે કરતાં પોલીસનો કાફલો સ્થળ ઉપર દોડી આવ્યો હતો.

પીએસઆઇ કહે છે કે 'આગળ જેને ઠોકાયું તેને 10 હજાર રૂપિયા આપી ચૂક્યો છું, પછી કોઈને અકસ્માત કર્યો નથી. હું નવાપુરા પોલીસ સ્ટેશનમાં હતો. ત્યાંથી રિટાયર્ડ થયો હતો.

નિવૃત્ત અધિકારી સામે અકસ્માત અને નશો કર્યાના બે અલગ અલગ ગુના નોંધાયા

ઉલ્લેખનીય છે કે અગાઉ પણ નિવૃત્ત પીએસઆઇએ એક અકસ્માત થતાં ત્યાં પણ રૂપિયા આપીને આવ્યા હોવાની કેફિયત તેમણે ખુદ જ વીડિયોમાં કરી હતી. સ્થાનિક પોલીસે નિવૃત્ત પોલીસકર્મી વિરુદ્ધ કાયદેસરની કાર્યવાહી હાથ ધરી છે. છેલ્લા કેટલાક સમયથી અકોટા તથા અટલબ્રિજ પર પણ અકસ્માતો સર્જાવાની વણઝાર સર્જાઇ છે, ત્યારે નાગરિકો સામે જોખમ ઊભું થયું છે, જેથી આ પ્રકારના લોકો સામે કડક કાર્યવાહી થાય એવી લોકો માગ કરી રહ્યા છે.

હિન્દુસ્થાન સમાચાર / હર્ષ શાહ