અમદાવાદ, 21 ઓકટોબર (હિ.સ.) : અમદાવાદના સેટેલાઈટ વિસ્તારમાં અન્ય સ્ત્રીઓ સાથે પતિના સંબંધની શંકા રાખી પત્નીનો જ પતિ પર એસિડ એટેક કર્યો, પતિની હાલત ગંભીર છે. સામાન્ય રીતે પુરુષ દ્વારા મહિલા પર એસિડ એટેકની ઘટનાઓ સામે આવતી હોય છે, પરંતુ આ કિસ્સામાં તો પત્નીએ જ પોતાના પતિ પર એસિડ ફેંક્યું હતું. આરોપી મહિલાએ પતિના અન્ય સ્ત્રીઓ સાથે સંબંધની શંકા રાખી એસિડ એટેક કર્યો છે. આ એસિડ એટેકમાં ભોગ બનનાર પતિ શરીરથી નીચેના ભાગે ગંભીર રીતે દાઝ્યો છે. સેટેલાઈટ પોલીસે આરોપી પત્નીની ધરપકડ કરી છે.

પોલીસ પાસેથી માહિતી અનુસાર સેટેલાઈટમાં રહેતા રોનક ખીમસૂરિયા નામના શખસે બે વર્ષ પહેલાં દમયંતી પરમાર નામની મહિલા સાથે પ્રેમ લગ્ન કર્યા હતા. છેલ્લા કેટલાક દિવસોથી પત્ની દમયંતીએ તેના પતિ પર અન્ય સ્ત્રીઓ સાથે આડા સંબંધ હોવાની શંકા રાખી સુતેલા પતિ પર પહેલાં તો ગરમ પાણી વેળ્યું અને બાદમાં એસિડ ફેંક્યું હતું. જે મામલે સેટેલાઈટ પોલીસ સ્ટેશનમાં ફરિયાદ બાદ આરોપી પત્નીની ધરપકડ કરવામાં આવી છે. પોલીસ તપાસમાં સામે આવ્યું છે કે, ફરિયાદી પતિ અને આરોપી પત્ની વચ્ચે બે વર્ષ પહેલાં પ્રેમ પાંગર્યો હતો અને ત્યાર બાદ બંને કોર્ટ મેરેજ કર્યા હતા.

આ અગાઉ પણ જ્યારે પતિ-પત્ની વેજલપુર વિસ્તારમાં રહેતા હતા ત્યારે શંકા રાખવાની બાબતે વેજલપુર પોલીસ સ્ટેશનમાં અરજી કરી હતી, પરંતુ પોલીસ દ્વારા સમજાવટ બાદ મામલો થાડે પાડ્યા બાદ ફરીથી તેઓ સાથે રહેવા લાગ્યા હતા. જોકે, ફરીથી તેની પત્નીએ શંકા રાખીને તક મળતાની સાથે જ પતિ પર એસિડ એટેક કર્યો. જેમાં પતિ ગંભીર રીતે દાઝી જતાં સારવાર માટે હોસ્પિટલ ખસેડવામાં આવ્યો છે.

હિન્દુસ્થાન સમાચાર / હર્ષ શાહ