અમરેલી, 26 ઓક્ટોબર (હિ.સ.) : અમરેલી તાલુકાના માલવણ ગામે આજે માલવણ યુવક મંડળ દ્વારા ભવ્ય સંગીત સંધ્યા કાર્યક્રમનું આયોજન કરવામાં આવ્યું હતું. સાંસ્કૃતિક રંગત અને લોકસંગીતના મધુર સ્વરોથી ગામનું વાતાવરણ આનંદમય બની ગયું હતું. કાર્યક્રમમાં મુખ્ય અતિથિ તરીકે ગુજરાત સરકારના મંત્રી કૌશિક વેકરીયા ઉપસ્થિત રહ્યા હતા. તેમણે યુવક મંડળના આ પ્રયાસની પ્રશંસા કરતાં જણાવ્યું કે ગામડાઓમાં આવા સાંસ્કૃતિક કાર્યક્રમોનું આયોજન થવું એ યુવાઓમાં સર્જનાત્મકતા અને સામાજિક એકતાની ભાવના વધારવા માટે મહત્વપૂર્ણ છે.

મંત્રી વેકરીયાએ સ્થાનિક પ્રતિભાશાળી કલાકારોને પ્રોત્સાહન આપ્યું અને જણાવ્યું કે ગામસ્તર પરની પ્રતિભા રાજ્યના ગૌરવમાં વધારો કરી શકે છે. કાર્યક્રમમાં મોટી સંખ્યામાં ગામજનો, મહિલા મંડળો અને યુવાઓએ હાજરી આપી હતી. સંગીત સંધ્યા દરમિયાન લોકગીતો, ગરબા અને સુફી સંગીતના કાર્યક્રમો રજૂ થયા હતા. અંતે યુવક મંડળના પ્રમુખે, મંત્રી અને આગંતુકોનો આભાર વ્યક્ત કર્યો હતો.

---------------

હિન્દુસ્થાન સમાચાર / Gondaliya Abhishek Nandrambhai