આગામી તા. ૬ નવેમ્બર સુધીમાં ફોર્મ ભરી મોકલવાના રહેશે

જુનાગઢ, 28 ઓક્ટોબર (હિ.સ.): રાજય સરકારના રમત ગમત, યુવા અને સાંસ્‍કૃતિક પ્રવૃતિઓ વિભાગ, ગાંધીનગર અને કમિશનર, યુવક સેવા અને સાંસ્કૃતિક પ્રવૃતિઓ, ગાંધીનગર દ્વારા આયોજિત અને જિલ્‍લા યુવા અને સાંસ્કૃતિક પ્રવૃતિઓની કચેરી, જૂનાગઢ દ્વારા અનુસુચિત જાતિના યુવક, યુવતીઓ માટે ખડક ચઢાણ બેઝીક કોર્સ વર્ષ ૨૦૨૫-૨૬ હાથ ધરવામાં આવશે.

જે અન્વયે ૧૪ થી ૩૫ વર્ષના વયજૂથમાં સમાવિષ્ટ અનુસુચિત જાતિના યુવક, યુવતીઓ માટે ખડક ચઢાણ બેઝીક કોર્ષનું આયોજન કરવાનું નક્કી કરવામાં આવ્યું છે. આ કોર્ષમાં ભાગ લેવા માટે ઇચ્છુક ઉમેદવારોએ નિયત નમુનાના ફોર્મ સાથે જરૂરી પ્રમાણપત્રો, આધાર પુરાવાની નકલ જોડીને ઉપરોક્ત કચેરીના ચાલુ દિવસો દરમિયાન આગામી તારીખ ૦૬/૧૧/૨૦૨૫ સુધીમાં જિલ્લા યુવા અને સાંસ્કૃતિક પ્રવૃતિઓની કચેરી, ૧/૧ બહુમાળી ભવન, સરદારબાગ, જૂનાગઢ– ૩૬૨૦૦૧ ખાતે મોકલી આપવાના રહેશે. તેમ જિલ્લા યુવા વિકાસ અધિકારી એન.ડી.વાળા, જૂનાગઢની યાદીમાં જણાવવામાં આવ્યું છે.

---------------

હિન્દુસ્થાન સમાચાર / ભરતસિંહ જાદવ