સીસી રોડ, CCTV કેમેરા અને ડિજિટલ ગ્રામપંચાયતથી ગામ બન્યું આદર્શ મોડેલ

અમરેલી, 28 ઓક્ટોબર (હિ.સ.) : સાવરકુંડલા તાલુકાનું ધાર ગામ હવે વિકાસની દિશામાં આગળ વધી રહ્યું છે. છેલ્લા એક વર્ષમાં ગામમાં અંદાજે ₹40 લાખના ખર્ચે વિવિધ વિકાસના કાર્યો હાથ ધરવામાં આવ્યા છે. આ કાર્યો ગામના દાતાઓ, ગ્રામજનો અને સરકારના સહયોગથી પૂર્ણ થયા છે. હસમુખભાઈ કાકડીયાએ જણાવ્યું કે તેઓ ધાર ગામના વતની છે અને છેલ્લા કેટલાય વર્ષોથી ગામના વિકાસ માટે લોકો એકતા સાથે કામ કરી રહ્યા છે.

ગામમાં સીસી રોડ અને પેપર બ્લોકનું કામ ઉત્તમ રીતે પૂર્ણ થયું છે, જેના કારણે ગામની આંતરિક માર્ગવ્યવસ્થા મજબૂત બની છે. વરસાદના પાણીનો નિકાલ સરળ બન્યો છે અને લોકો માટે ચાલવા-ફરવા સુવિધા મળી છે. ગામમાં સુરક્ષા માટે 15 થી વધુ CCTV કેમેરા લગાવવામાં આવ્યા છે, જેના કારણે ગામમાં શાંતિ અને સુરક્ષાનું વાતાવરણ વધ્યું છે.

ધાર ગામની એક વિશેષતા એ છે કે અહીં ગટર અને પાણીની સો ટકા વ્યવસ્થા ઉપલબ્ધ છે. દરેક ઘર સુધી સ્વચ્છ પાણી પહોંચે છે અને ગટર વ્યવસ્થા સુવ્યવસ્થિત રીતે કાર્યરત છે. આ સાથે જ ગામ પંચાયત સંપૂર્ણપણે ડિજિટલ સિસ્ટમ પર કાર્યરત છે — જે આધુનિક શાસન તરફ એક મોટું પગલું ગણાય છે. ગ્રામજનો ઓનલાઇન માધ્યમથી અનેક સેવાઓનો લાભ લઈ શકે છે, જેનાથી સમય અને સંસાધનો બંનેની બચત થાય છે.

ગામની કુલ વસ્તી આશરે 3,000 છે, જેમાંથી લગભગ 2,000 લોકો સુરત, અમદાવાદ અને વડોદરા જેવા મહાનગરોમાં રોજગાર અને વ્યવસાય માટે વસે છે. તેમ છતાં, તેઓ પોતાના વતન સાથે સતત જોડાયેલા છે અને ગામના વિકાસ માટે આર્થિક સહાયતા આપતા રહે છે.

હસમુખભાઈ કાકડીયા કહે છે કે “ગામમાં સતત વિકાસના કાર્યો ચાલુ છે. દરેક વર્ષે નવા પ્રોજેક્ટ હાથ ધરવામાં આવે છે અને ગ્રામજનોનો સહયોગ મળતો રહે છે.” ગામમાં સફાઈ, પાણી અને વીજળીની સુવિધાઓ ઉપરાંત જાહેર સ્થળો પર પ્રકાશની વ્યવસ્થા અને માર્ગસુવિધા પર પણ ખાસ ધ્યાન આપવામાં આવ્યું છે.

ધાર ગામે બતાવ્યું છે કે જો ગ્રામજનો અને પંચાયત સાથે મળી કાર્ય કરે તો નાનું ગામ પણ આધુનિકતા અને સુવિધાઓમાં શહેરોને ટક્કર આપી શકે છે. આ રીતે ધાર ગામ હવે સાવરકુંડલા તાલુકામાં એક મોડેલ ગ્રામપંચાયત તરીકે ઓળખાઇ રહ્યું છે, જેનાથી અન્ય ગામો પણ પ્રેરણા લઈ રહ્યા છે.

---------------

હિન્દુસ્થાન સમાચાર / Gondaliya Abhishek Nandrambhai