અમરેલી,8 ઓક્ટોબર (હિ.સ.)

અમરેલીમાં અમર ડેરી દ્વારા આયોજિત શરદોત્સવ મિલ્ક ડે કાર્યક્રમમાં ઈફકોના ચેરમેન અને સહકારી આંદોલનના શિલ્પી દિલીપભાઈ સંઘાણીનો અનોખો અંદાજ જોવા મળ્યો. કાર્યક્રમના અંત ભાગમાં ઓર્કેસ્ટ્રા અને લોકગીતોના માહોલ વચ્ચે સંઘાણી ડાક ડમરુના તાલે ઝૂમી ઊઠ્યા હતા. લોકગાયીકા સાથે મળીને તેમણે ડાક ડમરુ વગાડ્યો અને “અમે ગુજરાતી લહેરી લાલા” તથા “મોદીજી ગુજરાતી” જેવા ગીતો પર ઠુમકા લગાવતાં સમગ્ર પંડાલમાં ઉત્સાહની લહેર ફેલાઈ ગઈ.

દિલીપ સંઘાણીનો આ આનંદભર્યો અંદાજ જોઈને ઉપસ્થિત લોકોએ તાળીઓના ગડગડાટથી સ્વાગત કર્યું. સહકારી આંદોલનના અનુભવી નેતા તરીકે જાણીતા સંઘાણી સામાન્ય રીતે શાંત અને વ્યવસ્થિત રૂપે દેખાતા હોય છે, પરંતુ આ કાર્યક્રમમાં તેમનો સંગીતપ્રેમી અને ઉલ્લાસભર્યો પાસો સૌના દિલ જીતી ગયો.

શરદોત્સવ મિલ્ક ડે કાર્યક્રમમાં દૂધ ઉત્પાદકો, સહકારી આગેવાનો, મહિલાઓ અને યુવાનોની મોટી સંખ્યાએ હાજરી આપી હતી. લોકગીતો, ઓર્કેસ્ટ્રા અને દેશભક્તિ ગીતો સાથે અમરેલીની ધરતી પર સંગીત અને સંસ્કૃતિનો રંગીલો મેળો જામ્યો હતો.

“શિવજીના ડાક ડમરુ”ના સંગાથે જ્યારે સંઘાણી ઝૂમી ઊઠ્યા ત્યારે સમગ્ર માહોલ ભક્તિભાવથી છલકાઈ ગયો. આ દૃશ્યે દર્શાવ્યું કે સહકારી જગતના આ પ્રભાવશાળી નેતા માત્ર રાજકારણના મંચ પર જ નહીં, પરંતુ લોકસંસ્કૃતિ અને ભાવના સાથે પણ ઊંડો સંબંધ ધરાવે છે.

આ શરદોત્સવ મિલ્ક ડે કાર્યક્રમમાં દિલીપ સંઘાણીનો આ ઝૂમતો અંદાજ અમરેલીના નાગરિકો માટે યાદગાર બની ગયો છે અને સોશિયલ મીડિયા પર પણ આ દૃશ્યો ચર્ચાનો વિષય બન્યા છે.

---------------

હિન્દુસ્થાન સમાચાર / Gondaliya Abhishek Nandrambhai