પાટણ, 8 ઓક્ટોબર (હિ.સ.) પાટણ નગરપાલિકાએ ઘન કચરાનું યોગ્ય રીતે સંચાલન કરવા અને સ્વચ્છતા અભિયાનને વધુ વેગ આપવા મહત્વપૂર્ણ પગલું ભર્યું છે. શહેરીજનોને સૂકો અને ભીનો કચરો અલગ રાખવા માટે આજથી ડસ્ટબિન વિતરણનો આરંભ કરવામાં આવ્યો છે. આ વિતરણનો શુભારંભ નગરપાલિકા પ્રમુખ, સ્વચ્છતા શાખાના ચેરમેન હરેશભાઈ મોદી અને અન્ય કોર્પોરેટરોની ઉપસ્થિતિમાં કરવામાં આવ્યો હતો.

ડસ્ટબિન વિતરણ માટે ચાર ટેબલોની વ્યવસ્થા કરવામાં આવી છે, જ્યાં સવારથી જ મિલકતધારકોની લાંબી કતારો લાગી ગઈ હતી. ચેરમેન હરેશભાઈ મોદીએ સ્પષ્ટ જણાવ્યું કે ડસ્ટબિન ફક્ત તે શહેરીજનોને મળશે જેમણે વર્ષ 2025-26 માટેનો સંપૂર્ણ વેરો ભર્યો હોય. વેરો ભર્યાની પાવતી ધરાવનારા વ્યક્તિને તાત્કાલિક ડસ્ટબિન આપવામાં આવશે, જ્યારે ઓનલાઈન ચુકવણી કરનારોએ જરૂરી સિક્કો વેરા શાખામાંથી કરાવવાનો રહેશે.

સ્વચ્છ ભારત મિશન હેઠળ કચરાના સ્ત્રોતે જ વિભાજન કરવા માટે આ ડસ્ટબિન વિતરણ અભિયાન ખૂબ જ મહત્વપૂર્ણ છે. સૂકો (Dry Waste) અને ભીનો (Wet Waste) કચરો અલગ રાખવાનો હેતુ ધરાવતું આ વિતરણ આજે શરૂ થયું છે. હાલ પાટણ નગરપાલિકાને 56,000 ડસ્ટબિન મળ્યા છે, જેનો લાભ લેનારાઓ માટે સુવ્યવસ્થિત આયોજન સાથે વિતરણ થઈ રહ્યું છે.

હિન્દુસ્થાન સમાચાર / હાર્દિક રાઠોડ