જૂનાગઢ,19 નવેમ્બર (હિ.સ.) ખાસ સઘન સુધારણા કાર્યક્રમ ૨૦૨૫ અંતર્ગત હાલ ગણતરી ફોર્મ વિતરણની કામગીરી 99.77 એ પહોંચી ગઈ છે. તેમજ આ ફોર્મને મતદારો પાસેથી મેળવી ડિજિટલાઇઝ કરવાની કામગીરી 11.76 ટકા એટલે કે કુલ 1,52,903 ફોર્મ ડિજિટલાઈઝ થઈ ગયા છે.

આ સંદર્ભે જિલ્લા ચૂંટણી અધિકારી અને કલેકટર,જૂનાગઢ દ્વારા પ્રાંત અધિકારીની કચેરી,જૂનાગઢ ખાતે મુલાકાત લીધી હતી. હાલમાં ગણતરી ફોર્મ ડિજિટલાઈઝ કામગીરીની ચાલી રહી છે. જેમાં કલેક્ટર જૂનાગઢ દ્વારા બુથ લેવલ ઓફિસરની કામગીરીની સમિક્ષા કરી, જરૂરી સૂચનો આપ્યા તેમજ તેઓને સતત કામગીરી બદલ પ્રોત્સાહિત કર્યા હતા. તેમજ જૂનાગઢ જિલ્લો ગણતરી ફોર્મ ડિજિટલાઈઝ કરવામાં વધુ સારી રીતે પરફોર્મ કરે તે માટે આગામી સમયમાં જિલ્લામાં સારી કામગીરી કરનાર દસ બી.એલ.ઓને સન્માનપત્ર અને પ્રોત્સાહન ઇનામ આપવામાં આવશે.

જિલ્લા ચૂંટણી અધિકારી ની કચેરી તરફથી જૂનાગઢના મતદારોને અપીલ કરવામાં આવે છે કે હજુ પણ ઘણા મતદારોએ પોતાના ગણતરી ફોર્મ સંપૂર્ણ ભરીને બુથ લેવલ ઓફિસરને જમા કરાવેલ નથી જેથી તેઓને વહેલી તકે પોતાના મતદાન મથકના બીએલઓશ્રીને જમા કરવા વિનંતી છે. હજુ પણ લોકોને ગણતરી ફોર્મ ભરવામાં મુશ્કેલી હોય તો chunavsetu-search.gujarat.gov.in/SIRSerach.aspx તથા voter.eci.gov.in/download-eroll માં મતદાર પોતે પોતાની 2002 ની વિગતો મેળવી શકે છે .

હિન્દુસ્થાન સમાચાર / ભરતસિંહ જાદવ