અમરેલી, 11 ડિસેમ્બર (હિ.સ.) : 1987માં અમરેલી શહેરના એક નાનકડા શોપથી શરૂ થયેલી શીતલ ફૂડ પ્રોડક્શન લિમિટેડ આજે વિશ્વના 15 દેશોમાં પોતાના ગુણવત્તાયુક્ત પ્રોડક્ટ નિકાસ કરતી આગવી અને પ્રતિષ્ઠિત કંપની બની ચૂકી છે. દિનેશભાઈ ભુવાના માર્ગદર્શન હેઠળ શરૂ થયેલી આ કંપની આજે 350 કરોડનું વાર્ષિક ટર્નઓવર ધરાવતી અમરેલી જિલ્લાના પ્રથમ નંબરની કંપની તરીકે ઓળખાય છે. એક સામાન્ય દુકાનથી શરૂ થયેલું આ બ્રાન્ડ આજે વૈશ્વિક બજારમાં ‘ટ્રસ્ટ’ અને ‘ક્વોલિટી’નું પ્રતિક બની ગયું છે.

કંપનીના ઓપરેશન હેડ હાર્દિક ભુવા જણાવે છે કે શીતલ આજે પલ્સ, ડેરી અને ફૂડ પ્રોડક્ટ સહિત 900 થી વધુ પ્રોડક્ટનું ઉત્પાદન કરે છે. દેશના 6 રાજ્યો—ઉત્તર પ્રદેશ, મધ્ય પ્રદેશ, રાજસ્થાન, મહારાષ્ટ્ર, પંજાબ અને જમ્મુ—માં વિવિધ પ્રોડક્ટની વેચાણ વ્યવસ્થા છે. રાજ્ય અને રાષ્ટ્રીય બજાર સાથેસાથે આંતરરાષ્ટ્રીય બજારમાં પણ શીતલની હાજરી ખૂબ મજબૂત છે.

વિદેશી બજારમાં મજબૂત હસ્તક્ષેપ

શીતલના પ્રોડક્ટની નિકાસ નેપાળ, ભૂટાન, સિંગાપુર, હોંગકોંગ, ઓસ્ટ્રેલિયા, યુનાઇટેડ સ્ટેટ્સ (US), યુએઈ અને કોંગો જેવા દેશોમાં મોટા પાયે કરવામાં આવે છે. દરેક દેશના ફૂડ સેફ્ટીના પોતાના નિયમો અને સ્ટાન્ડર્ડ હોય છે, જેને ધ્યાનમાં રાખીને શીતલ પોતાની ઉત્પાદન પ્રક્રિયા તૈયાર કરે છે. વિદેશી ટીમો નિયમિત પ્લાન્ટની મુલાકાત લઈ પ્રક્રિયા અને ગુણવત્તાનું નિરીક્ષણ કરે છે. કડક નિયમોને અનુસરનાર કંપની તરીકે શીતલને વિશ્વનું સર્વોચ્ચ એક્સપોર્ટ સર્ટિફિકેશન BRC Certificate પ્રાપ્ત થયું છે. જ્યારે ડેરી અને ડેરી પ્રોડક્ટના નિકાસ માટે ભારત સરકાર દ્વારા EIA Certificate પણ એનાયત કરવામાં આવ્યું છે.

રોજગારનું મોટું કેન્દ્ર — 70% મહિલા કર્મચારીઓ

કંપનીમાં રોજબરોજ 2000 જેટલા લોકો રોજગાર મેળવે છે, જેમાંથી લગભગ 70 ટકા મહિલા કર્મચારીઓ છે. વિવિધ વિભાગોમાં મહિલાઓ સક્રિય ભૂમિકા નિભાવે છે, જે કંપનીના વિકાસ સાથે મહિલા સશક્તિકરણનું પણ ઉત્તમ ઉદાહરણ છે. ઉત્પાદન, પેકેજિંગ, ક્વોલિટી ચેકથી લઈને મેનેજમેન્ટના વિવિધ સ્તરે મહિલાઓ પોતાનું યોગદાન આપે છે.

ઉત્પાદન ક્ષમતા — પ્રગતિનો મજબૂત આધાર

શીતલના પ્લાન્ટની ક્ષમતા રોજના 2 લાખ લીટર આઈસ્ક્રીમ ઉત્પાદન, 50 હજાર લીટર મિલ્ક પાઉચ ફીલિંગ અને 5 ટન પનીર બનાવવાની છે. આ જ મજબૂત ઉત્પાદન ક્ષમતા કંપનીને ભારત અને વિદેશના મોટા બજારોમાં પ્રોડક્ટ સપ્લાય કરવામાં સક્ષમ બનાવે છે. વિદેશમાં મોકલાતા દરેક કન્ટેનરમાં 20 થી 25 ટન સુધીનો માલ ભરવામાં આવે છે. દેશ-વિદેશના ડિસ્ટ્રિબ્યુટર મારફતે પ્રોડક્ટ મોલ અને લોકલ શોપ સુધી પહોંચાડવામાં આવે છે.

વિદેશી બજારમાં ભારતીય સ્વાદની માંગ સતત વધી રહી છે, જેમાં ખાસ કરીને નાન અને પનીરની સૌથી વધુ માંગ રહે છે. આ માંગને ધ્યાનમાં રાખીને કંપની ઉચ્ચ ગુણવત્તા સાથે ઉત્પાદન અને સપ્લાય કરે છે.

એક દુકાનથી વૈશ્વિક ઓળખ — શીતલની સફર

1987માં અમરેલીના એક નાના શોપથી શરૂ થયેલ શીતલ આજે વટવૃક્ષ બની ગયું છે. ગુણવત્તા, નિયમિતતા અને વૈશ્વિક ધોરણોનું પાલન—આ ત્રણ સ્તંભોએ શીતલને વિશ્વ બજારમાં પહોંચાડ્યું છે. દિનેશભાઈ ભુવાના વિઝન અને ટીમની મહેનતે શીતલ આજે માત્ર અમરેલીનું નહીં પરંતુ ગુજરાત અને ભારતમાં ગૌરવ બનેલું બ્રાન્ડ છે.

શીતલની સફળતા સાબિત કરે છે કે સંકલ્પ, ગુણવત્તા અને મહેનત હોય તો નાનકડી શરૂઆત પણ વિશ્વના નકશા પર સ્થાન બનાવી શકે છે.

---------------

હિન્દુસ્થાન સમાચાર / Gondaliya Abhishek Nandrambhai