અમરેલી, 13 ડિસેમ્બર (હિ.સ.) લીલીયા તથા વંડા પોલીસ સ્ટેશન દ્વારા “MISSION SMILE” અભિયાન અંતર્ગત પ્રાથમિક શાળાના બાળકો માટે વિશેષ જાગૃતિ કાર્યક્રમનું આયોજન કરવામાં આવ્યું હતું. આ કાર્યક્રમનો મુખ્ય હેતુ બાળકોને સુરક્ષિત સ્પર્શ (Good Touch) અને અસુરક્ષિત સ્પર્શ (Bad Touch) વિશે યોગ્ય સમજ આપવાનો હતો, જેથી તેઓ કોઈ પણ અનિચ્છનીય પરિસ્થિતિમાં પોતાને સુરક્ષિત રાખી શકે.

કાર્યક્રમ દરમિયાન પોલીસ અધિકારીઓએ સરળ ભાષા, ઉદાહરણો અને ચિત્રોના માધ્યમથી બાળકોને સમજાવ્યું કે કયો સ્પર્શ સુરક્ષિત છે અને કયો સ્પર્શ અસુરક્ષિત છે. બાળકોને કોઈ અજાણી વ્યક્તિ દ્વારા કે ઓળખીતાં વ્યક્તિ દ્વારા કરવામાં આવતા ખોટા સ્પર્શ સામે “ના” કહેવાની હિંમત રાખવા, તરત જ વિશ્વાસપાત્ર વ્યક્તિને જાણ કરવા અને જરૂર પડે ત્યારે પોલીસ કે હેલ્પલાઈન નંબર પર સંપર્ક કરવા માટે માર્ગદર્શન આપવામાં આવ્યું.

પોલીસ દ્વારા બાળકોને સમજાવવામાં આવ્યું કે તેઓ પોતાની સુરક્ષા અંગે ખુલ્લેઆમ વાત કરી શકે છે અને કોઈ પણ ભય વગર મદદ માંગવી જોઈએ. આ સાથે શાળાના શિક્ષકો અને સ્ટાફને પણ બાળકો પર સતત નજર રાખવા તથા શંકાસ્પદ પરિસ્થિતિમાં તાત્કાલિક કાર્યવાહી કરવાની અપીલ કરવામાં આવી.

આ કાર્યક્રમથી બાળકોમાં આત્મવિશ્વાસ વધ્યો તેમજ માતા-પિતા અને શિક્ષકોમાં પણ બાળ સુરક્ષા અંગે વધુ જાગૃતિ આવી. “MISSION SMILE” અંતર્ગત આવી પ્રવૃત્તિઓ દ્વારા પોલીસ સમાજમાં સુરક્ષાનો મજબૂત સંદેશ આપી રહી છે.

---------------

હિન્દુસ્થાન સમાચાર / Gondaliya Abhishek Nandrambhai