મહેસાણા,16 ડિસેમ્બર (હિ.સ.) મહેસાણા ખાતે ગુજરાત રાજ્યમાં અમલમાં રહેલા મહત્વના પ્રોજેક્ટ્સ માટે જમીન સંપાદન અને ફાળવણી સંબંધિત મુદ્દાઓની સમીક્ષા અર્થે વિડિયો કોન્ફરન્સના માધ્યમથી મહત્વપૂર્ણ બેઠક યોજાઈ હતી. આ સમીક્ષા બેઠકમાં રાજ્ય કક્ષાના અધિકારીઓ દ્વારા વિવિધ જિલ્લાઓમાં ચાલી રહેલા વિકાસ પ્રોજેક્ટ્સની હાલની સ્થિતિ અંગે વિગતવાર માહિતી રજૂ કરવામાં આવી.
બેઠક દરમિયાન જમીન સંપાદન પ્રક્રિયામાં આવતી અડચણો, કાનૂની પ્રક્રિયાઓ, જમીન માલિકોના પ્રશ્નો તેમજ ફાળવણીમાં થતી વિલંબની પરિસ્થિતિઓ અંગે ચર્ચા કરવામાં આવી. વિકાસ પ્રોજેક્ટ્સ સમયસર પૂર્ણ થાય તે માટે જમીન સંબંધિત પ્રક્રિયાઓ ઝડપી અને પારદર્શક રીતે પૂર્ણ કરવાની જરૂરિયાત ઉપર ખાસ ભાર મૂકવામાં આવ્યો હતો.
મહેસાણા જિલ્લામાં ચાલતા વિવિધ રાજ્યસ્તરીય પ્રોજેક્ટ્સ માટે જમીન સંપાદન અને ફાળવણીની પ્રગતિ અંગે પણ રજૂઆત કરવામાં આવી. સંબંધિત અધિકારીઓએ પ્રોજેક્ટ મુજબની સ્થિતિ, બાકી રહેલી કાર્યવાહી અને આગામી આયોજન અંગે માહિતી આપી હતી. રાજ્યના ઉચ્ચ અધિકારીઓ દ્વારા માર્ગદર્શન આપીને પ્રશ્નોના નિરાકરણ માટે યોગ્ય સૂચનાઓ આપવામાં આવી હતી.
આ બેઠકમાં વિડિયો કોન્ફરન્સ દ્વારા વિવિધ જિલ્લાઓના કલેક્ટર, વિભાગીય અધિકારીઓ અને સંબંધિત કર્મચારીઓ જોડાયા હતા. બેઠકનો મુખ્ય હેતુ રાજ્યના વિકાસકાર્યોને ગતિ આપવાનો અને જમીન સંબંધિત પ્રશ્નોનું સમયસર નિરાકરણ સુનિશ્ચિત કરવાનો રહ્યો હતો.
---------------
હિન્દુસ્થાન સમાચાર / RINKU AMITKUMAR THAKOR
