- કરોડોના ખર્ચે વેલણ, ભેભા અને હરમડિયાના વિદ્યાર્થીઓની શૈક્ષણિક સુવિધામાં ઉમેરો થયો*

ગીર સોમનાથ, 19 ડિસેમ્બર (હિ.સ.) : શિક્ષણ મંત્રી પ્રદ્યુમનભાઈ વાજાની ગીર સોમનાથ જિલ્લાની એક દિવસીય મુલાકાત દરમિયાન મંત્રીના હસ્તે જિલ્લાના વેલણ, ભેભા અને હરમડિયા ખાતે કરોડોના ખર્ચે વિવિધ શૈક્ષણિક પ્રકલ્પોનું લોકાર્પણ-ખાતમુહૂર્ત સંપન્ન થયા હતાં.

આ અવસરે મંત્રીએ જણાવ્યું હતું કે, શિક્ષણ એ મનુષ્યના જીવન ઘડતરનો પાયો અને સમાજની પ્રગતિનો મુખ્ય આધાર છે. જો શિક્ષણ તંદુરસ્ત તો સમાજ તંદુરસ્ત અને સમાજ તંદુરસ્ત તો રાષ્ટ્ર તંદુરસ્ત, જો રાષ્ટ્ર તંદુરસ્ત તો જ ખરા અર્થમાં વિકસિત રાષ્ટ્ર બનશે. શિક્ષણ એ એક એવું સાધન છે, જેના માધ્યમથી જ વૈચારિક પ્રગતિ શક્ય છે. વડાપ્રધાન નરેન્દ્ર મોદીનું સપનું વિકસિત ભારતનું છે. રાષ્ટ્રનું ભવિષ્ય વર્ગખંડમાંથી નિર્માણ થાય છે અને શિક્ષણ એ રાષ્ટ્રના વિકાસની આધારશીલા છે. આ શીલા મજબૂત હશે તો રાષ્ટ્રની હરણફાળ ઉન્નતિ થશે.મુખ્યમંત્રી ભૂપેન્દ્રભાઈ પટેલના નેતૃત્વમાં છેવાડાના માનવી સુધી વિકાસના ફળ પહોંચી રહ્યાં છે. જેના પરિણામ સ્વરૂપ ગીર સોમનાથ જિલ્લાના છેવાડાના ગામોમાં પણ અવિરત વિકાસકામો થઈ રહ્યાં છે, એમ એમણે ઉમેર્યું હતું.

સ્ટેટ પ્રોજેક્ટ કચેરી ગાંધીનગર અંતર્ગત કોડીનાર તાલુકાના વેલણ ખાતે મંત્રીશ્રીના હસ્તે સરકારી માધ્યમિક શાળાનું ખાતમુહૂર્ત કરવામાં આવ્યું હતું. અંદાજીત રૂ.૪.૫૦ કરોડના ખર્ચે તૈયાર થનાર શાળામાં અત્યાધુનિક વર્ગખંડ, પુસ્તકાલય, કૉમ્પ્યુટર લેબ, સ્ટાફ રૂમ, એક્ટિવિટી રૂમ, પેન્ટ્રી વગેરે જેવી માળખાગત સુવિધાઓ ઉભી કરવામાં આવશે. જેનો લાભ વેલણ, કોટડા અને માઢવાડ સહિત આસપાસના ગ્રામ્ય વિદ્યાર્થીઓને મળશે.

આ જ ઉપક્રમે ભેભા ગામે મંત્રીના હસ્તે અંદાજીત રૂ.૧ કરોડના ખર્ચે પ્રાથમિક શાળાના વિવિધ પ્રકલ્પોનું લોકાર્પણ કરવામાં આવ્યું હતું. જેમાં સ્કૂલ ઓફ એક્સલન્સ અંતર્ગત સમારકામ થયેલા વર્ગખંડ, મીડ ડે મીલ રસોડું, વિદ્યાર્થીઓ માટે ટોઈલેટ અને બ્લોક નાખવા સહિતના નવીનીકરણ પામેલા પ્રકલ્પોનો સમાવેશ થાય છે. જ્યારે ગીરગઢડા તાલુકાના હરમડિયા ખાતે મંત્રીશ્રીએ અંદાજીત રૂ.૪.૫૦ કરોડના ખર્ચે તૈયાર થયેલા સરકારી માધ્યમિક અને ઉચ્ચતર માધ્યમિક શાળાના નવા બિલ્ડિંગનું લોકાર્પણ કર્યું હતું. મંત્રીના હસ્તે વેરાવળ, ગોરખમઢી, ગીરગઢડા, ઈણાજ, ખાપટ સહિત વિવિધ ગામના શિક્ષકોને પૂરા પગારના આદેશ આપવામાં આવ્યા હતાં. તમામ શાળાઓની મુલાકાત સમયે મંત્રીએ વિદ્યાર્થીઓ સાથે સ્નેહભર્યો સંવાદ સાધ્યો હતો અને ભેભા ખાતે દિવ્યાંગ વ્હીલચેર ક્રિકેટની આંતરરાષ્ટ્રીય ભારતીય ટીમમાં પસંદગી પામનાર શિક્ષકનું સન્માન કર્યું હતું.

આ ખાતમુહૂર્ત-લોકાર્પણ કાર્યક્રમમાં જિલ્લા પંચાયત પ્રમુખ મંજૂલા મૂછાર, ધારાસભ્ય કાળુ રાઠોડ, પૂર્વ સાંસદ દીનુ સોલંકી, કોડીનાર નગરપાલિકા ઉપપ્રમુખ શિવાભાઈ સોલંકી, જિલ્લા શિક્ષણ અધિકારી એમ.પી.બોરીચા, જિલ્લા પ્રાથમિક શિક્ષણ અધિકારી અશોક પટેલ સહિત અગ્રણીઓ અને ગ્રામજનો ઉપસ્થિત રહ્યાં હતાં.

---------------

હિન્દુસ્થાન સમાચાર / ભરતસિંહ જાદવ