અમરેલી, 20 ડિસેમ્બર (હિ.સ.) : અમરેલી જિલ્લાના વકીલ સમુદાય માટે મહત્વપૂર્ણ ગણાતી અમરેલી વકીલ મંડળની ચૂંટણી તાજેતરમાં શાંતિપૂર્ણ અને લોકશાહી માહોલમાં સંપન્ન થઈ હતી. આ ચૂંટણીમાં હિરેન્દ્રસિંહ વાળાને પ્રમુખ તરીકે બહુમતિથી ચૂંટવામાં આવ્યા છે. તેમની જીતથી વકીલ વર્ગમાં ઉત્સાહનો માહોલ જોવા મળ્યો છે.

હિરેન્દ્રસિંહ વાળા લાંબા સમયથી વકીલાતના ક્ષેત્રમાં સક્રિય છે અને તેમણે પોતાના વ્યવસાય દરમિયાન ન્યાય, પારદર્શકતા અને વકીલોના હિત માટે સતત પ્રયત્નો કર્યા છે. તેઓ અગાઉ પણ વકીલ મંડળની વિવિધ સમિતિઓમાં જવાબદારીઓ સંભાળી ચૂક્યા છે, જેના કારણે તેમને સંસ્થાકીય કામગીરીનો વિશાળ અનુભવ છે. નવનિયુક્ત પ્રમુખ તરીકે હિરેન્દ્રસિંહ વાળાએ તમામ વકીલ મિત્રોનો આભાર વ્યક્ત કર્યો હતો અને કહ્યું હતું કે, “મને મળેલ વિશ્વાસને યોગ્ય રીતે નિભાવવાનો હું સંપૂર્ણ પ્રયાસ કરીશ. વકીલોના પ્રશ્નો, સુવિધાઓમાં વધારો, અદાલતી કાર્યક્ષમતામાં સુધારો અને યુવા વકીલોના માર્ગદર્શન માટે ખાસ પહેલ કરવામાં આવશે.” તેમની ચૂંટણી બાદ વકીલ મંડળના સભ્યો દ્વારા અભિનંદન આપવામાં આવ્યા હતા. આવનાર સમયમાં અમરેલી વકીલ મંડળ વધુ સક્રિય અને એકતાબદ્ધ બની વકીલોના હિતમાં કામ કરશે તેવી આશા વ્યક્ત કરવામાં આવી છે.

---------------

હિન્દુસ્થાન સમાચાર / Gondaliya Abhishek Nandrambhai