સુરત, 25 ડિસેમ્બર (હિ.સ.)સુરત સહિત સમગ્ર દેશમાં ચાલી રહેલી મતદાર યાદી શુદ્ધિકરણ પ્રક્રિયા (SIR) વચ્ચે સુરતના સાંસદ મુકેશ દલાલ દ્વારા મ્યુનિસિપલ કમિશ્નર અને જિલ્લા કલેક્ટરને લખાયેલા એક સ્ફોટક પત્રથી રાજકીય હલચલ તેજ બની છે. સાંસદે પત્રમાં ગંભીર આશંકા વ્યક્ત કરી છે કે SIR તપાસ દરમિયાન સુરતના કેટલાક વિસ્તારોમાંથી મોટી સંખ્યામાં મતદારો રાતોરાત ગાયબ થઈ ગયા છે, જે શહેરની સલામતી માટે જોખમરૂપ સંકેત હોઈ શકે છે.

પત્રમાં જણાવ્યા મુજબ, હાલ BLO-1 અને BLO-2ની ટીમો દ્વારા ઘરે-ઘરે જઈને મતદાર યાદીનું શુદ્ધિકરણ કરવામાં આવી રહ્યું છે. આ પ્રક્રિયાનો મુખ્ય હેતુ એવા લોકોના નામ યાદીમાંથી દૂર કરવાનો છે, જે ભારતના નાગરિક નથી અને ગેરકાયદેસર રીતે મતદાર તરીકે નોંધાયેલા છે.

સાંસદે સોશિયલ મીડિયા અને મીડિયા અહેવાલોનો હવાલો આપીને લખ્યું છે કે જ્યારે BLOની ટીમ સુરતના કેટલાક ‘કુખ્યાત’ ગણાતા વિસ્તારોમાં ચકાસણી માટે ગઈ, ત્યારે ત્યાં મોટી સંખ્યામાં ઘરોને તાળા લાગેલા મળ્યા અને લોકો અચાનક ગાયબ થઈ ગયા હતા. તેમણે પ્રશ્ન ઉઠાવ્યો છે કે જો આ મતદારો કાયદેસર અને સાચા નાગરિક હોય, તો તપાસના ડરથી ભાગવાની જરૂર કેમ પડી? એટલી મોટી સંખ્યામાં લોકો એકસાથે ક્યાં અદૃશ્ય થઈ ગયા—આ ગંભીર તપાસનો વિષય છે.

પત્રમાં ભારપૂર્વક જણાવાયું છે કે આ રીતે લોકોનું ગાયબ થવું સુરત શહેરની શાંતિ, સલામતી અને અસ્મિતા માટે ખતરનાક છે. સાંસદે વહીવટી તંત્ર પાસે માંગ કરી છે કે ગાયબ થયેલા લોકોને શોધી કાઢવા માટે તાત્કાલિક પગલાં લેવામાં આવે, તેઓ કોઈ ગુનાહિત પ્રવૃત્તિમાં સંકળાયેલા છે કે કેમ તેની ઊંડાણપૂર્વક તપાસ થાય અને દોષિત જણાય તો કડક કાયદેસરની કાર્યવાહી કરવામાં આવે.

ઉલ્લેખનીય છે કે SIR કામગીરી દરમિયાન મતદાર યાદીમાંથી નામ કપાતને લઈને પહેલેથી જ વિવાદ ઊભો થયો છે. હવે સાંસદના આ પત્રે સમગ્ર મામલાને નવો વળાંક આપ્યો છે.

---------------

હિન્દુસ્થાન સમાચાર / યજુવેન્દ્ર દુબે