અમરેલી, 27 ડિસેમ્બર (હિ.સ.) : અમરેલી શહેરના બહારપરા વિસ્તારમાંથી પ્રતિબંધિત ગોગો સ્મોક કોનનું ગેરકાયદેસર રીતે વેચાણ કરનાર યુવકને અમરેલી સીટી પોલીસે ઝડપી લીધો છે. હ્યુમન સોર્સ પરથી મળેલી ચોક્કસ બાતમીના આધારે પોલીસે તાત્કાલિક કાર્યવાહી કરી સદામશાહ નામના યુવકને અટકાયત કરી હતી.

પોલીસને માહિતી મળી હતી કે બહારપરા વિસ્તારમાં એક ઈસમ દ્વારા પ્રતિબંધિત ગોગો સ્મોક કોનનું વેચાણ કરવામાં આવી રહ્યું છે, જે જાહેર સલામતી અને કાયદો-વ્યવસ્થાને ખોરવવાની શક્યતા ધરાવે છે. આ બાતમીના આધારે અમરેલી સીટી પોલીસની ટીમે સ્થળ પર દરોડો પાડી આરોપીને ઝડપી લીધો હતો. તપાસ દરમિયાન તેના કબ્જામાંથી પ્રતિબંધિત સ્મોક કોન જપ્ત કરવામાં આવ્યા હતા.

પોલીસે જણાવ્યું હતું કે ગોગો સ્મોક કોન જેવા પ્રતિબંધિત પદાર્થોનો ઉપયોગ બાળકો અને યુવાનોમાં જોખમ ઉભું કરે છે તેમજ જાહેર સ્થળોએ ભય અને અફરાતફરી ફેલાવવાનો ખતરો રહે છે. રાજ્ય સરકારના આદેશ મુજબ આવા પદાર્થોના વેચાણ અને ઉપયોગ પર પ્રતિબંધ છે.

આ મામલે આરોપી સામે કાયદેસરની કાર્યવાહી હાથ ધરવામાં આવી છે. અમરેલી સીટી પોલીસ દ્વારા શહેરમાં પ્રતિબંધિત અને જોખમી સામગ્રીના વેચાણ સામે સતત નજર રાખવામાં આવી રહી છે. નાગરિકોને પણ આવા ગેરકાયદેસર કાર્યો અંગે જાણ મળે તો તરત પોલીસને માહિતી આપવા અપીલ કરવામાં આવી છે.

---------------

હિન્દુસ્થાન સમાચાર / Gondaliya Abhishek Nandrambhai