-સોશિયલ મીડિયા, બ્લોગ્સ અને ડિજિટલ પ્લેટફોર્મ્સે ગુજરાતી સાહિત્ય, સંસ્કૃતિને વૈશ્વિક સ્તરે પોચાડી

-ગુજરાતી યુવાનો ફેસબુક, ઈન્સ્ટાગ્રામ, થ્રેડ અને યુ ટ્યુબ પ્લેટફોર્મ્સ પર ગુજરાતી ભાષામાં કન્ટેન્ટ બનાવે છે

-ડિજિટલ યુગમાં ગુજરાતી ભાષા સામે અનેક પડકારો પણ રહેલા છે

ભરૂચ 3 જૂન (હિ.સ.) આજના ડિજિટલ યુગમાં ગુજરાતી ભાષા પોતાનું વિશિષ્ટ સ્થાન જાળવી રાખવા મથામણ કરી રહી છે. ટેકનોલોજીના વિકાસ સાથે ગુજરાતી ભાષા નવા માધ્યમોમાં પ્રવેશી રહી છે. સોશિયલ મીડિયા, બ્લોગ્સ અને ડિજિટલ પ્લેટફોર્મ્સે ગુજરાતી સાહિત્ય અને સંસ્કૃતિને વૈશ્વિક સ્તરે પહોંચાડવામાં મહત્વની ભૂમિકા ભજવી છે.

સ્વામી જયસ્વરૂપ અંકલેશ્વર ગુરુકુળ દ્વારા અનોખું માર્ગદર્શન ગુજરાતી ભાષા બચાવવા આપ્યું હતું જેમાં આજે ગુજરાતી યુવાનો ફેસબુક, ઈન્સ્ટાગ્રામ, થ્રેડ અને યુ ટ્યુબ જેવા પ્લેટફોર્મ્સ પર ગુજરાતી ભાષામાં કન્ટેન્ટ બનાવી રહ્યા છે, જે નવી પેઢીને પોતાની મૂળ ભાષા સાથે જોડી રહ્યું છે. ગુજરાતી યુવાનો ફેસબુક, ઈન્સ્ટાગ્રામ, થ્રેડ અને યુ ટ્યુબ જેવા પ્લેટફોર્મ્સ પર ગુજરાતી ભાષામાં કન્ટેન્ટ બનાવી રહ્યા છે. ઓનલાઇન ગુજરાતી શબ્દકોશ, ઇ-બુકસ અને ભાષા શીખવાની એપ્સ લોકોને ગુજરાતી શીખવામાં અને તેનો ઉપયોગ કરવામાં મદદ કરે છે. જો કે, ડિજિટલ યુગમાં ગુજરાતી સામે અનેક પડકારો પણ છે. અંગ્રેજી અને અન્ય વિદેશી ભાષાઓના વધતા પ્રભાવને કારણે ગુજરાતી ભાષાનો ઉપયોગ ઘટવાનો ભય રહેલો છે. ખાસ કરીને શહેરી યુવાનોમાં ગુજરાતી બોલવા અને લખવાની આદત ઘટી રહી છે. આ માટે સરકાર, શૈક્ષણિક સંસ્થાઓ, ગુજરાતી સંસ્થાનો, ભાષા પર જેમનું પ્રભુત્વ છે તેવા સારસ્વત વિદ્વાનો અને સમાજે સાથે મળીને ગુજરાતી ભાષાને પ્રોત્સાહન આપવું અત્યંત જરૂરી છે.

શાળાઓમાં ગુજરાતી ભાષાના શિક્ષણને વધુ રસપ્રદ અને આધુનિક બનાવવું જોઈએ. વિદ્યાર્થીઓ ગુજરાતી ભાષામાં વક્તવ્ય આપી શકે તેવા સેમિનાર યોજીને ગુજરાતી ભાષાને મહત્વ આપવું અનિવાર્ય બન્યું છે. ગુજરાતી ભાષા એ માત્ર શબ્દોનું સમૂહ નથી, પરંતુ આપણી સંસ્કૃતિ, પરંપરા, નૈતિક આદર્શો, સંસ્કારો, પારિવારિક ખાનદાની અને ઓળખનું પ્રતીક છે.ડિજિટલ યુગમાં તેને જીવંત રાખવા માટે આપણે સૌએ સાથે મળીને પ્રયાસ કરવો જોઈએ. જેથી આવનારી પેઢીઓ પણ તેની સુંદરતાનો આનંદ માણી શકે.

---------------

હિન્દુસ્થાન સમાચાર / અતુલકુમાર પટેલ