રાજકોટ 14 જુલાઈ (હિ.સ.) : રાજકોટ શહેરની વોર્ડ નંબર 8માં ભારતીય જનતા પાર્ટી દ્વારા આયુષ્માન ભારત અને વયવંદના યોજના અંતર્ગત લાભાર્થીઓને લાભ મળે તે હેતુથી વિશેષ કેમ્પનું આયોજન કરાયું હતું. વૈશાલીનગર ખાતે આવેલા આવકાર ફ્લેટમાં આયોજિત આ કેમ્પમાં મોટી સંખ્યામાં સ્થાનિક રહેવાસીઓએ ઉપસ્થિતિ આપી હતી અને યોજનાના કાર્ડો બનાવ્યા હતા.

આ કેમ્પમાં વોર્ડ નંબર 8ના વિવિધ વિસ્તારોમાંથી આવેલા નાગરિકોએ આયુષ્માન ભારત કાર્ડ તેમજ વયવંદના કાર્ડ બનાવીને આરોગ્ય સંબંધિત લાભ મેળવવા માટે નોંધણી કરાવી હતી. કેન્દ્રીય સરકારની આ યોજનાઓ હેઠળ નાગરિકોને નિઃશુલ્ક આરોગ્ય સેવાઓ મળે છે તેમજ વયવંદના યોજના દ્વારા વૃદ્ધ નાગરિકોને નિવૃત્તિ પછી નિશ્ચિત આવક મળે છે. લોકોને યોજનાની વિગતવાર જાણકારી આપવામાં આવી હતી તેમજ કાઉન્સેલિંગ દ્વારા યોગ્ય માર્ગદર્શન પણ અપાયું હતું.કાર્ડ બનાવવા માટે સ્થાનિક નાગરિકોએ જરૂરી દસ્તાવેજો સાથે હાજરી આપી હતી. કેમ્પમાં અગ્રણીઓએ લોકોને સરકારની વિવિધ જનકલ્યાણકારી યોજનાઓના લાભ લેવા પ્રોત્સાહિત કર્યા હતા. કેમ્પમાં વોર્ડ નં. 8ના કાર્યકરો, મહિલા મોરચાના સભ્યો તથા યુવા કાર્યકરોની કામગીરી પ્રશંસનીય રહી હતી.

આ રીતે આયોજિત કેમ્પ દ્વારા ઘણી સંખ્યામાં નાગરિકોએ સરકારી યોજનાનો લાભ મેળવી એક સફળ કાર્યક્રમ બની રહ્યો હતો.

---------------

હિન્દુસ્થાન સમાચાર / Gondaliya Abhishek