ભુજ – કચ્છ, 24 જુલાઇ (હિ.સ.) : કચ્છના ભચાઉ તાલુકાના લાકડિયા વિસ્તારમાં આવેલી સૌરાષ્ટ્ર એન્વાયરો પ્રોજેક્ટ પ્રા. લિ. કંપની ખાતે રૂ. 875 કરોડના નાર્કોટિક્સના જંગી જથ્થાનો ગુજરાતના ગૃહ રાજ્યમંત્રી હર્ષ સંઘવીની ઉપસ્થિતિમાં વૈજ્ઞાનિક પદ્ધતિથી નાશ કરાયો હતો. આ પ્રસંગે ગૃહ રાજ્યમંત્રી સંઘવીએ જણાવ્યું હતું કે, દેશના યુવાધનને બરબાદ કરનારા ડ્રગ્સને ભઠ્ઠીમાં આગને હવાલે કરીને ખાખ કરતા મને સંતોષ પ્રાપ્ત થયો છે. આ કાર્યવાહી ગુજરાત સરકારની ડ્રગ્સ મુક્ત ગુજરાતની પ્રતિબદ્ધતા દર્શાવે છે.

NDPS એક્ટ હેઠળ કુલ 28 કેસમાં જપ્ત કરાયો જથ્થો

ગૃહ રાજ્યમંત્રી તથા રાજ્યકક્ષાની ઉચ્ચ સ્તરીય ડ્રગ્સ ડિસ્પોઝલ કમિટી અને ત્રણેય જિલ્લાની પોલીસ સ્થાનિક ડ્રગ્સ ડિસ્પોઝલ કમિટી દ્વારા પૂર્વ કચ્છ (ગાંધીધામ) ના 11 કેસ, પશ્ચિમ કચ્છ (ભુજ) ના 16 કેસ અને મોરબી જિલ્લાનો 1 કેસ મળીને NDPS એક્ટ હેઠળ કુલ 28 કેસમાં જપ્ત કરેલા રૂ. 875 કરોડની કિંમતના 391.625 કિલો અને 8986 લીટર માદક પદાર્થનો સૌરાષ્ટ્ર એન્વાયરો પ્રોજેક્ટ પ્રા. લિ. ખાતે કંપનીના ઇન્સિનેરેશન પ્લાન્ટ (ભઠ્ઠી) માં વૈજ્ઞાનિક પદ્ધતિથી નાશ કરવામાં આવ્યો હતો.

ડ્રગ્સના દૂષણ સામે ગુજરાત પોલીસની જંગ

મંત્રી સંઘવીએ ગુજરાત અને કચ્છ પોલીસની કામગીરીને બિરદાવતા જણાવ્યું હતું કે, ડ્રગ્સના દુષણ સામે ગુજરાત પોલીસ એક જંગ લડી રહી છે. ગુજરાત પોલીસે ભારત પાકિસ્તાનની સીમા હોય કે, સમુદ્રની તેજ લહેરો હોય કે, અન્ય રાજ્યો વચ્ચે ચાલતા રેકેટ હોય તેને નાકામ કરીને ઐતિહાસિક ડ્રગ્સનો જથ્થો પકડી પાડીને યુવા ધનને બરબાદ કરવાના મનસૂબા ધરાવતા તત્વો સામે ધાક બેસાડતી કાર્યવાહી કરી છે. ગુજરાત પોલીસ સરહદ પારથી ઘુસાડવામાં આવતા ડ્રગ્સના દૂષણને નાથવા માટે કટિબદ્ધ હોવાનું જણાવીને કચ્છ સરહદથી ઘુસાડીને રાજ્યના યુવાનોને બરબાદ કરવાના પ્રયાસોને નિષ્ફળ બનાવનાર કચ્છ પોલીસની કામગીરીને બિરદાવી હતી.

કચ્છના અગ્રણીઓ પણ ઉપસ્થિત રહ્યા

આ પ્રસંગે ધારાસભ્ય વિરેન્દ્રસિંહ જાડેજા, અગ્રણી દેવજીભાઈ વરચંદ અને ધવલભાઈ આચાર્ય, કચ્છ બોર્ડર રેન્જ આઇજી ચિરાગ કોરડીયા, પૂર્વ કચ્છ પોલીસ અધિક્ષક સાગર બાગમાર, પશ્ચિમ કચ્છ પોલીસ અધિક્ષક વિકાસ સુંડા, મોરબી પોલીસ અધિક્ષક રાહુલ ત્રિપાઠી, પ્રાંત અધિકારી જ્યોતિ ગોહિલ, પોલીસ કર્મચારીશ્રીઓ તેમજ સૌરાષ્ટ્ર એન્વાયરો પ્રોજેક્ટ પ્રા. લિ. ના અધિકારીઓ ઉપસ્થિત રહ્યા હતાં.

હિન્દુસ્થાન સમાચાર / BHAVIN KAILASHCHANDRA VORA