- રાષ્ટ્રીય યુદ્ધ સ્મારક પર પુષ્પાંજલિ અર્પણ કરવામાં આવી, સાઉથ બ્લોક લોન ખાતે ગાર્ડ ઓફ ઓનર આપવામાં આવ્યું

નવી દિલ્હી, 01 ઓગસ્ટ (હિ.સ.) વાઇસ એડમિરલ સંજય વાત્સ્યાયને શુક્રવારે 47મા વાઇસ ચીફ ઓફ નૌકાદળ સ્ટાફ (વીસીએનએસ) તરીકે કાર્યભાર સંભાળ્યો. તેમણે રાષ્ટ્રીય યુદ્ધ સ્મારક પર પુષ્પાંજલિ અર્પણ કરીને રાષ્ટ્રની સેવામાં સર્વોચ્ચ બલિદાન આપનારા બહાદુરોને શ્રદ્ધાંજલિ આપી. ત્યારબાદ સાઉથ બ્લોક લોન ખાતે તેમને ગાર્ડ ઓફ ઓનર આપવામાં આવ્યું. તોપખાના અને મિસાઇલ સિસ્ટમના નિષ્ણાત સંજય વાત્સાયને ત્રણ દાયકાથી વધુ સમય સુધી તેમની નૌકાદળ કારકિર્દીમાં વિવિધ કમાન્ડ, ઓપરેશનલ અને સ્ટાફ જવાબદારીઓ નિભાવી છે.

નૌકાદળના વાઇસ ચીફ તરીકે કાર્યભાર સંભાળતા પહેલા, તેમણે ઇન્ટિગ્રેટેડ ડિફેન્સ સ્ટાફ (ડીસીઆઈડીએસ) ખાતે ડેપ્યુટી ચીફ ઓફ ઓપરેશન્સ તરીકે અને ત્યારબાદ આઈડીએસ હેડક્વાર્ટરમાં ડીસીઆઈડીએસ (નીતિ, આયોજન અને દળ વિકાસ) તરીકે સેવા આપી હતી, જ્યાં તેમણે ત્રણેય દળોમાં ઓપરેશનલ કોઓર્ડિનેશન, એકીકરણ, સંયુક્તતા, દળ વિકાસ અને સ્વદેશીકરણને પ્રોત્સાહન આપતી નીતિઓના નિર્માણમાં મુખ્ય ભૂમિકા ભજવી હતી. ફેબ્રુઆરી 2020 માં, તેમણે ફ્લેગ ઓફિસર કમાન્ડિંગ ઇસ્ટર્ન ફ્લીટ તરીકે કાર્યભાર સંભાળ્યો અને ગલવાન ખીણમાં ચીન સાથેની લોહિયાળ અથડામણ પછી દરિયાઇ પ્રવૃત્તિઓ દરમિયાન અનેક ઓપરેશનલ ડિપ્લોયમેન્ટ્સ અને કસરતોનું નેતૃત્વ કર્યું.

પુણેની નેશનલ ડિફેન્સ એકેડેમીના 71મા કોર્ષના ભૂતપૂર્વ વિદ્યાર્થી, વાઇસ એડમિરલ સંજય વાત્સ્યાયને, 01 જાન્યુઆરી 1988 ના રોજ ભારતીય નૌકાદળમાં પોતાની કારકિર્દી શરુ કરી હતી. ફ્લેગ ઓફિસરે સમુદ્રમાં વિવિધ ફ્રન્ટલાઇન યુદ્ધ જહાજોમાં સેવા આપી છે, જેમાં ગાઇડેડ મિસાઇલ ડિસ્ટ્રોયર આઈએનએસ મૈસુર, આઈએનએસ નિશંકના કમિશનિંગ ક્રૂ અને કોસ્ટ ગાર્ડ ઓપીવી આઈસીજીએસ સંગ્રામના પ્રીકમિશનિંગ ક્રૂનો સમાવેશ થાય છે. તેમણે આઈએનએસ મૈસુરના એક્ઝિક્યુટિવ ઓફિસર તરીકે પણ સેવા આપી છે. તેમણે કોસ્ટ ગાર્ડ શિપ સી-05, મિસાઇલ વેસેલ્સ આઈએનએસ વિભૂતિ અને આઈએનએસ નાશક, મિસાઇલ કોર્વેટ આઈએનએસ કુથાર અને ગાઇડેડ મિસાઇલ ફ્રિગેટ આઈએનએસ સહ્યાદ્રી (કમિશનિંગ કમાન્ડિંગ ઓફિસર)નું નેતૃત્વ કર્યું છે.

ડિફેન્સ સર્વિસીસ સ્ટાફ કોલેજ, વેલિંગ્ટન, નેવલ વોર કોલેજ અને પ્રતિષ્ઠિત નેશનલ ડિફેન્સ કોલેજ, નવી દિલ્હીના સ્નાતક, ફ્લેગ ઓફિસરે મુખ્ય વ્યૂહાત્મક અને નીતિ-લક્ષી સ્ટાફ ભૂમિકાઓમાં પણ શ્રેષ્ઠ કામગીરી બજાવી છે. નૌકાદળ મુખ્યાલયમાં તેમની નિમણૂકોમાં સંયુક્ત નિયામક અને નિયામક કર્મચારી (નીતિ), નિયામક નૌકાદળ આયોજન (પર્સ્પેક્ટિવ પ્લાનિંગ) અને મુખ્ય નિયામક નૌકાદળ આયોજનનો સમાવેશ થાય છે. ફેબ્રુઆરી, 2018 માં ફ્લેગ રેન્ક પર બઢતી મેળવ્યા પછી, તેમણે પૂર્વીય ફ્લીટની કમાન સંભાળતા પહેલા સહાયક નૌકાદળ સ્ટાફ (નીતિ અને આયોજન) તરીકે સેવા આપી હતી.

તેમને 2021 માં તેમના અસાધારણ નેતૃત્વ અને તેમની નૌકાદળ કારકિર્દીમાં સર્વોચ્ચ ક્રમની ગુણવત્તાયુક્ત સેવા માટે અતિ વિશિષ્ટ સેવા મેડલ એનાયત કરવામાં આવ્યો હતો. ત્યારબાદ તેમણે રાષ્ટ્રીય સંરક્ષણ એકેડેમીના ડેપ્યુટી કમાન્ડન્ટ તરીકે સેવા આપી હતી. ડિસેમ્બર, 2021 માં, તેમને પૂર્વીય નૌકાદળ કમાન્ડ (ઈએનસી) ના ચીફ ઓફ સ્ટાફ તરીકે નિયુક્ત કરવામાં આવ્યા. તેમના કાર્યકાળ દરમિયાન, તેમણે ઈએનસીની ઓપરેશનલ તૈયારી, કર્મચારીઓના વિકાસ અને માળખાગત વિસ્તરણનું માર્ગદર્શન આપ્યું.

હિન્દુસ્થાન સમાચાર / સુનિત નિગમ / પવન કુમાર

હિન્દુસ્થાન સમાચાર / ડો.હિતેશ એન.વ્યાસ