મહેસાણા, 11 ઓગસ્ટ (હિ.સ.): ઉત્તર ગુજરાતના વડનગર સ્થિત પૌરાણિક હાટકેશ્વર મહાદેવ મંદિર ખાતે પવિત્ર શ્રાવણ માસના ત્રીજા સોમવારે મુખ્યમંત્રીએ ભક્તિભાવ પૂર્વક પૂજન-અર્ચન કર્યા. તેમણે રાષ્ટ્ર અને રાજ્યના વિકાસ, પ્રગતિ તથા નાગરિકોની સુખાકારી, સમૃદ્ધિ અને શાંતિ માટે પ્રાર્થના કરી.

હાટકેશ્વર મંદિરનો સમાવેશ સ્વદેશ દર્શન યોજના અને હેરિટેજ સર્કિટ પ્રોજેક્ટમાં કરવામાં આવ્યો છે. મંદિર પરિસરમાં યાત્રાધામ વિકાસ બોર્ડ દ્વારા બીજા તબક્કામાં રૂ. 4.22 કરોડના ખર્ચે ગર્ભગૃહ, સભામંડપ, શિખર, યજ્ઞશાળા અને સ્વાગત કેન્દ્રના કામો પૂર્ણ થયા છે. પ્રથમ તબક્કામાં રૂ. 18 કરોડના કામો પૂરાં થયા હતા, જ્યારે ગુજરાત પ્રવાસન નિગમે રૂ. 5.53 કરોડના ખર્ચે લાઈટ એન્ડ સાઉન્ડ શો શરૂ કર્યો છે.

આ અવસરે આરોગ્ય મંત્રી ઋષિકેશ પટેલ, જિલ્લા પંચાયત પ્રમુખ તૃષાબેન પટેલ, પ્રવાસન અને દેવસ્થાન વિભાગના સચિવ રાજેન્દ્રકુમાર, યાત્રાધામ વિકાસ બોર્ડના સચિવ રમેશ મેરજા, ધારાસભ્ય કે.કે. પટેલ, જિલ્લા કલેક્ટર એસ.કે. પ્રજાપતિ, જિલ્લા વિકાસ અધિકારી ડૉ. હસરત જસ્મીન, નિવાસી અધિક કલેક્ટર જે.કે. જેગોડા સહિત તાલુકા અને શહેરના અધિકારીઓ તથા હાટકેશ્વર મહાદેવ સંસ્થાનના ટ્રસ્ટના પદાધિકારીઓ ઉપસ્થિત રહ્યા.

---------------

હિન્દુસ્થાન સમાચાર / RINKU AMITKUMAR THAKOR