ભાવનગર 14 ઓગસ્ટ (હિ.સ.): આંતરરાષ્ટ્રીય યુવા દિવસના અવસર પર રોટરી ક્લબ ઓફ ભાવનગર વાયબ્રન્ટ દ્વારા રિજનલ સાયન્સ સેન્ટર ખાતે વૃક્ષારોપણ અભિયાનનો બીજો તબક્કો યોજાયો. આ અભિયાન હેઠળ વિવિધ જાતિના કુલ 100 રોપાઓ વાવવામાં આવ્યા, જે પર્યાવરણ સંરક્ષણ અને હરિયાળી વધારવાના હેતુ સાથેનું મહત્વપૂર્ણ પગલું છે.
કાર્યક્રમમાં પાલીતાણા શહેરની એક શાળાના 25 વિદ્યાર્થીઓએ પણ ઉત્સાહપૂર્વક ભાગ લીધો. યુવાનોની આ ભાગીદારીને પર્યાવરણ પ્રત્યેની જવાબદારી અને જાગૃતિનો ઉત્તમ ઉદાહરણ ગણાવાયો. વાવેલા રોપાઓમાં ફળદ્રુપ, છાંયાદાર તેમજ ઔષધીય વૃક્ષોના છોડનો સમાવેશ કરવામાં આવ્યો, જેથી આવનારા સમયમાં પર્યાવરણને લાભ થાય અને સ્થાનિક જૈવિવિવિધતા વધે. રોટરી ક્લબના પ્રતિનિધિઓએ જણાવ્યું કે આ પહેલ ટકાઉ ભવિષ્યની દિશામાં એક નાનું પરંતુ અસરકારક પગલું છે. તેમણે યુવાનોને પ્રેરણા આપતાં જણાવ્યું કે વૃક્ષારોપણ માત્ર એક દિવસનું કાર્ય નથી, પરંતુ તેના સંરક્ષણ અને સંભાળ માટે સતત પ્રયત્ન આવશ્યક છે. આ અભિયાનના અંતે સૌએ પર્યાવરણ બચાવવા અને હરિયાળી જાળવવા માટે વ્યક્તિગત સ્તરે યોગદાન આપવાનો સંકલ્પ લીધો.
---------------
હિન્દુસ્થાન સમાચાર / Gondaliya Abhishek Nandrambhai
