મુંબઈ, નવી દિલ્હી, 14 ઓગસ્ટ (હિ.સ.). અભિનેત્રી શિલ્પા શેટ્ટી અને તેના પતિ રાજ કુન્દ્રા, ફરી એકવાર કાનૂની મુશ્કેલીમાં ફસાયેલા જોવા મળ્યા છે. હવે મુંબઈના એક ઉદ્યોગપતિ દીપક કોઠારીએ પોલીસમાં બંને સામે 60 કરોડ રૂપિયાની છેતરપિંડીની ફરિયાદ કરી છે. આ છેતરપિંડી શિલ્પા અને રાજની હવે બંધ થયેલી કંપની બેસ્ટ ડીલ ટીવી પ્રાઇવેટ લિમિટેડ સાથે સંબંધિત સોદા દરમિયાન થઈ હતી.

કોઠારીની ફરિયાદની પ્રાથમિક તપાસ બાદ, આર્થિક ગુના શાખા (ઈઓડબ્લ્યુ) એ રાજ કુન્દ્રા અને શિલ્પા શેટ્ટી સહિત અન્ય એક વ્યક્તિ સામે આરોપી તરીકે કેસ નોંધ્યો છે. ઉદ્યોગપતિ કોઠારીનો આરોપ છે કે વ્યવસાયિક રોકાણના નામે લીધેલા તેમના પૈસા વ્યક્તિગત ખર્ચ માટે ઉપયોગમાં લેવાયા હતા. તેમણે 2015 થી 2023 વચ્ચે વ્યવસાય વિસ્તરણના નામે આ રકમ આપી હતી. ફરિયાદ મુજબ, રાજેશ આર્ય નામના વ્યક્તિએ દીપક કોઠારીનો શિલ્પા શેટ્ટી અને રાજ કુન્દ્રા સાથે પરિચય કરાવ્યો હતો. તે સમયે, રાજ અને શિલ્પા બેસ્ટ ડીલ ટીવી પ્રાઇવેટ લિમિટેડના ડિરેક્ટર હતા, જે એક હોમ શોપિંગ અને ઓનલાઈન રિટેલ પ્લેટફોર્મ છે. આરોપ છે કે, બંનેએ 75 કરોડ રૂપિયાની લોન લીધી હતી, જેના પર 12 ટકા વ્યાજ ચૂકવવાનું હતું. વ્યાજથી બચવા માટે, તેઓએ કથિત રીતે રકમમાં છેડછાડ કરી અને તેને લોનને બદલે કંપનીમાં રોકાણ તરીકે બતાવી. ફરિયાદીનું કહેવું છે કે શિલ્પા શેટ્ટી અને રાજ કુન્દ્રાએ તેમને દર મહિને પૈસા પરત કરવાની ખાતરી આપી હતી, પરંતુ વચન છતાં તેમણે ચૂકવણી કરી ન હતી. શિલ્પા આ વ્યવહારમાં સાક્ષી તરીકે હાજર હતી, જોકે, સપ્ટેમ્બર 2016 માં, તેણીએ અચાનક કંપનીના ડિરેક્ટર પદ પરથી રાજીનામું આપી દીધું. કોઠારીના જણાવ્યા અનુસાર, તેમને પાછળથી શિલ્પા અને રાજના કથિત કારનામાઓ વિશે અગાઉ ખબર પડી, તેમજ તેમની કંપની સામે નાદારીનો કેસ પહેલાથી જ ચાલી રહ્યો છે.

કોઠારીનો આરોપ છે કે, 2015 થી 2023 ની વચ્ચે, શિલ્પા શેટ્ટી, રાજ કુન્દ્રા અને તેમના સહયોગીઓએ એક સુનિયોજિત ષડયંત્ર હેઠળ લોકોને છેતર્યા હતા. લગભગ 60.48 કરોડ રૂપિયાની છેતરપિંડીના કેસમાં, મુંબઈ પોલીસની આર્થિક ગુના શાખા (ઈઓડબ્લ્યુ) એ શિલ્પા અને રાજ વિરુદ્ધ આઈપીસી ની કલમ 403, 406 અને 34 હેઠળ એફઆઈઆર નોંધી છે. હાલમાં આ મામલો તપાસ હેઠળ છે. નોંધનીય છે કે શિલ્પા અને રાજ પહેલા પણ ઘણી વખત વિવાદોમાં હેડલાઇન્સ બનાવી ચૂક્યા છે.

હિન્દુસ્થાન સમાચાર / લોકેશ ચંદ્ર દુબે / સુનીલ સક્સેના

હિન્દુસ્થાન સમાચાર / ડો.હિતેશ એન.વ્યાસ