અમરેલી, 10 સપ્ટેમ્બર (હિ.સ.)
લાઠી પોલીસ દ્વારા સ્ટુડન્ટ પોલીસ કેડેટ (SPC) કાર્યક્રમ અંતર્ગત બાળકો માટે ખાસ આયોજન કરવામાં આવ્યું હતું. આ કાર્યક્રમ દરમિયાન બાળકોને શિક્ષણ સાથે સાથે સામાજિક જાગૃતિ અને શિસ્ત અંગે માર્ગદર્શન આપવા પર ભાર મૂકાયો.
આજે યોજાયેલી બેઠકમાં SPC બાળકોને વિવિધ વિષયો પર જૂથ સમીક્ષા કરાવવામાં આવી હતી, જેમાં ટ્રાફિક નિયમો, સાયબર ક્રાઈમ, નશાબંધી અને સામાજિક જવાબદારી જેવા મુદ્દાઓ પર ચર્ચા કરવામાં આવી હતી. પોલીસ અધિકારીઓએ બાળકોને સરળ ભાષામાં સમજાવી જણાવ્યું કે નાની ઉંમરે જ શિસ્ત અને કાયદા પ્રત્યે સન્માન શીખી લેવું ખૂબ જરૂરી છે.
કાર્યક્રમમાં બાળકો માટે ઈનડોર ગેમ્સનું પણ આયોજન કરવામાં આવ્યું હતું. રમતમાં ભાગ લઈને બાળકોમાં ટીમ સ્પિરિટ, નેતૃત્વ અને સહકારની ભાવના વિકસાવવામાં આવી હતી. ગેમ્સના માધ્યમથી બાળકોને મનોરંજન સાથે જીવનની મહત્વપૂર્ણ મૂલ્યો સમજાવવામાં આવ્યા.
આ આયોજનથી બાળકોમાં ઉત્સાહનો માહોલ જોવા મળ્યો હતો. પોલીસ અધિકારીઓએ જણાવ્યું કે આવા કાર્યક્રમો દ્વારા ભવિષ્યમાં બાળકો જવાબદાર નાગરિક બની શકે છે. લાઠી પોલીસનો આ પ્રયાસ સ્થાનિક સ્તરે પ્રશંસનીય બન્યો છે.
---------------
હિન્દુસ્થાન સમાચાર / Gondaliya Abhishek Nandrambhai
