અમરેલી, 13 સપ્ટેમ્બર (હિ.સ.): અમરેલી જિલ્લાના ધારી શહેરમાં ગત રાત્રે તસ્કરોએ ચાર દુકાનોને નિશાન બનાવી ચોરીની ઘટના અંજામ આપી હતી. ચોરો દુકાનોના તાળા તોડી અંદર પ્રવેશ્યા અને કુલ રૂ. 28,500ની રોકડ રકમ ચોરીને ફરાર થઈ ગયા.

આ ઘટનાથી વેપારીઓમાં ભારે નારાજગી અને ભયનું વાતાવરણ જોવા મળ્યું છે. ચોરીની જાણ થતા પોલીસ તંત્ર તાત્કાલિક ઘટના સ્થળે દોડી આવ્યું અને પ્રાથમિક તપાસ હાથ ધરી. પોલીસ દ્વારા આસપાસના સીસીટીવી કેમેરાની ફૂટેજ મેળવવામાં આવી છે, જેમાં કેટલાક સંદિગ્ધોની હલચલ જોવા મળી છે. આ ફૂટેજના આધારે તસ્કરોની ઓળખ કરી તેમને ઝડપવા માટે પોલીસે તીવ્ર તપાસ શરૂ કરી છે.

વેપારીઓએ સતત વધી રહેલી ચોરીની ઘટનાઓ અંગે ચિંતા વ્યક્ત કરી છે અને રાત્રિના સમયમાં પેટ્રોલિંગ વધારવા માંગણી કરી છે. પોલીસ અધિકારીઓએ વેપારીઓને વિશ્વાસ આપ્યો છે કે ટૂંક સમયમાં જ તસ્કરોને ઝડપી લેવામાં આવશે અને કડક પગલાં લેવાશે.

ધારી શહેરમાં બનેલી આ ઘટનાએ ફરી એકવાર સ્પષ્ટ કર્યું છે કે વેપારી વર્ગ માટે સુરક્ષાની વ્યવસ્થા વધુ મજબૂત બનાવવાની જરૂર છે.

---------------

હિન્દુસ્થાન સમાચાર / Gondaliya Abhishek Nandrambhai