મહેસાણા, 23 સપ્ટેમ્બર (હિ.સ.) મહેસાણા જિલ્લામાં “સ્વચ્છતા હી સેવા – 2025” અભિયાન અંતર્ગત વિવિધ સ્થળોએ સ્વચ્છતા કાર્યક્રમોનું આયોજન કરવામાં આવ્યું. જિલ્લાના સરકારી કચેરીઓ, આરોગ્ય સંસ્થાઓ તેમજ આંગણવાડી કેન્દ્રોમાં સફાઈ અભિયાન હાથ ધરવામાં આવ્યું, જેમાં સ્થાનિક જનસમુદાયે પણ ઉત્સાહપૂર્વક ભાગ લીધો.
આ અભિયાન અંતર્ગત વડનગર તાલુકાના બાદરપુર ગામે આંગણવાડીમાં સફાઈ કરવામાં આવી. સામુહિક આરોગ્ય કેન્દ્ર (CHC) – કમાલી અને પ્રાથમિક આરોગ્ય કેન્દ્ર (PHC) – બ્રાહ્મણવાડા (તા. ઊંઝા) ખાતે પણ સ્વચ્છતા કાર્યક્રમ યોજાયો. એ જ રીતે આયુષ્માન આરોગ્ય મંદિર – કાલરી, તાલુકા પંચાયત – બેચરાજી અને ગ્રામ પંચાયત – હાજીપુર ખાતે સફાઈ કામગીરી હાથ ધરાઈ.
આ અભિયાનમાં આરોગ્ય કર્મચારીઓ, સરકારી કચેરીઓના કર્મચારીઓ, આંગણવાડી કાર્યકરો અને ગ્રામજનો સક્રિયપણે જોડાયા હતા. તેમના સહભાગથી સ્વચ્છતા જાગૃતિ ફેલાઈ રહી છે અને સમાજમાં સફાઈ પ્રત્યેની જવાબદારીને વેગ મળી રહ્યો છે.
સ્વચ્છતા હી સેવા અભિયાનનો મુખ્ય હેતુ નાગરિકોમાં સ્વચ્છતા પ્રત્યે સજાગતા વધારવાનો છે, જેથી સ્વચ્છ પર્યાવરણ સાથે સ્વસ્થ સમાજનું નિર્માણ થઈ શકે. મહેસાણા જિલ્લાના વિવિધ ગામડાઓમાં યોજાયેલા આ કાર્યક્રમો દ્વારા લોકોમાં સ્વચ્છતાની આદત વિકસે તેવો વિશ્વાસ વ્યક્ત થયો છે.
હિન્દુસ્થાન સમાચાર / RINKU AMITKUMAR THAKOR
