ગીર સોમનાથ 24 સપ્ટેમ્બર (હિ.સ.) દ્વાદશ જ્યોતિર્લિંગોમાં પ્રથમ, ભગવાન સોમનાથની પાવન ભૂમિ પરથી આસ્થા, સ્ત્રીસશક્તિકરણ અને આત્મનિર્ભર ભારતનો એક નવો અધ્યાય લખાઈ રહ્યો છે. અહીં, મહાદેવને અર્પણ થતાં પીતાંબર હવે માત્ર આસ્થાનું પ્રતીક નથી, પરંતુ દાદાના વસ્ત્રો ગ્રામીણ મહિલાઓના આર્થિક સ્વાવલંબનનું માધ્યમ બની રહ્યા છે. શ્રી સોમનાથ ટ્રસ્ટની એક અનોખી પહેલ અંતર્ગત, આ પવિત્ર વસ્ત્રોમાંથી કલાત્મક અને આકર્ષક કુર્તા તૈયાર કરવામાં આવી રહ્યા છે, જે ન માત્ર દેશ-વિદેશના ભક્તો સુધી મહાદેવના પ્રસાદ બનીને પહોંચશે, પરંતુ સોમનાથની આસપાસના ગામોની મહિલાઓને 'લખપતિ દીદી' બનાવવાનો માર્ગ પણ પ્રશસ્ત કરશે.

આ સંપૂર્ણ પરિકલ્પનાની પ્રેરણા છે શ્રી સોમનાથ ટ્રસ્ટના માનનીય અધ્યક્ષ અને ભારતના યશસ્વી પ્રધાનમંત્રી, શ્રી નરેન્દ્રભાઈ મોદી તેમનું 'નારી શક્તિ'ને રાષ્ટ્ર શક્તિ બનાવવાનું ઓજસ્વી માર્ગદર્શન આ પહેલમાં સ્પષ્ટપણે પ્રતિબિંબિત થાય છે.

શ્રી સોમનાથ ટ્રસ્ટની આ પહેલ તેમની સામાજિક જવાબદારીની ઊંડી પરંપરાનો જ એક વિસ્તાર છે. આ પહેલાં પણ, ટ્રસ્ટ સોમનાથજી અને માતા પાર્વતીના શૃંગારમાં ઉપયોગમાં લેવાયેલા પવિત્ર વસ્ત્રોને ૨૧,૦૦૦થી વધુ જરૂરિયાતમંદો સુધી પહોંચાડી ચૂક્યું છે. મહાદેવનો આ વસ્ત્ર પ્રસાદ જ્યારે કોઈ વ્યક્તિ સુધી પહોંચે છે, ત્યારે તેની સાથે એક અમૂલ્ય સંદેશ પણ જાય છે કે તે ક્યારેય એકલો નથી, કારણ કે સૌના નાથ છે સોમનાથ.

હવે આ જ ભાવનાને આગળ વધારતા, ટ્રસ્ટે આસ્થાને આત્મનિર્ભરતા સાથે જોડી છે.

પ્રધાનમંત્રી મોદીની 'લખપતિ દીદી'ની સંકલ્પના, જેનો ઉદ્દેશ્ય ગ્રામીણ મહિલાઓની વાર્ષિક આવકને એક લાખ રૂપિયાથી વધુ કરવાનો છે, તેને શ્રી સોમનાથ ટ્રસ્ટે ધાર્મિક અને આધુનિક બિંદુઓનો અદ્ભુત સંગમ કરીને સાકાર રૂપ આપ્યું છે.

આસ્થાના તાંતણે ગૂંથાઈ રહ્યું છે આત્મનિર્ભરતાનું વસ્ત્ર

આ પહેલ પરંપરાગત પ્રસાદ વિતરણથી એક કદમ આગળ વધીને, તેને રોજગાર અને સન્માન સાથે જોડે છે. શ્રી સોમનાથ ટ્રસ્ટે વિશેષ પ્રશિક્ષણ કાર્યક્રમો દ્વારા ગ્રામીણ મહિલાઓના કૌશલ્યને નિખાર્યું છે. આ મહિલાઓ હવે મહાદેવને શ્રદ્ધાપૂર્વક અર્પણ કરાયેલા પીતાંબરને ખૂબ જ કલાત્મકતાથી ભવ્ય વસ્ત્ર પ્રસાદના રૂપમાં પરિવર્તિત કરી રહી છે. આ કુર્તાઓની વિશેષતા માત્ર તેમનું પવિત્ર મૂળ જ નથી, પરંતુ તેમની આધુનિક ડિઝાઇન પણ છે. રંગબેરંગી, ડિઝાઇનર કોલર અને ડમરૂ, ત્રિશુલ, શિખર સહિતની શિવ-તત્વ સાથે જોડાયેલી વિશેષ બેક પ્રિન્ટ સાથે તૈયાર કરાયેલા આ કુર્તા આજના સમયના ફેશન ટ્રેન્ડને પણ પૂરા કરે છે.

સોમનાથની નજીકના ગામડાઓની મહિલાઓ, જે આ પહેલ સાથે જોડાયેલી છે, તેમના ચહેરા પર એક નવો આત્મવિશ્વાસ છે. તે કહે છે, પહેલા અમે ઘરના કામો સુધી જ સીમિત હતા. પરંતુ ટ્રસ્ટે અમને તાલીમ આપી અને આજે અમારા હાથથી બનેલા કુર્તા ભગવાનના આશીર્વાદ બનીને દેશના ખૂણે-ખૂણે પહોંચશે, એ વિચારીને જ મન ગર્વથી ભરાઈ જાય છે. હવે અમે પણ ઘર ચલાવવામાં બરાબરની ભાગીદાર છીએ.

દિલ્હી-મુંબઈ સુધી પહોંચશે, ગામની દીદીની કળા:

શ્રી સોમનાથ ટ્રસ્ટની આ વાત્સલ્ય રૂપી યોજના એ સુનિશ્ચિત કરી રહી છે કે અનેક મહિલાઓ દ્વારા નિર્મિત આ વસ્ત્ર પ્રસાદ માત્ર સ્થાનિક બજારો સુધી સીમિત ન રહે. ટ્રસ્ટની વેબસાઇટ દ્વારા સુદ્રઢ વિતરણ પ્રણાલીથી, આ આકર્ષક કુર્તા દિલ્હી, મુંબઈ, બેંગલુરુ જેવા મહાનગરો અને દેશ-વિદેશમાં બેઠેલા ભક્તો સુધી પહોંચશે. આનાથી ન માત્ર આ મહિલાઓની આવકમાં અભૂતપૂર્વ વૃદ્ધિ થશે, પરંતુ તેમની કળા અને મહેનતને એક રાષ્ટ્રીય મંચ પણ મળશે.

આ પહેલ સુંદરતા, આસ્થા અને સ્ત્રી સશક્તિકરણનો એક અનોખો સંગમ છે. એક તરફ જ્યાં ભક્તો પોતાના આરાધ્યના પ્રસાદને વસ્ત્રના રૂપમાં ધારણ કરી શકશે, ત્યાં બીજી તરફ, દરેક કુર્તાની ખરીદી સોમનાથ ક્ષેત્રની એક ગ્રામીણ મહિલાના જીવનને ઉજાળવામાં સીધો ફાળો આપશે.

પ્રધાનમંત્રી શ્રી નરેન્દ્ર મોદીજીના માર્ગદર્શન હેઠળ, શ્રી સોમનાથ ટ્રસ્ટની આ પહેલ એ વાતનો પુરાવો છે કે કેવી રીતે આપણી ધાર્મિક સંસ્થાઓ સામાજિક પરિવર્તન અને આર્થિક સશક્તિકરણની વાહક બની શકે છે. આ યોજના ન માત્ર મહિલાઓને આર્થિક રીતે આત્મનિર્ભર બનાવી રહી છે, પરંતુ તેમને એક નવી ઓળખ અને સન્માન પણ અપાવી રહી છે, જે 'આત્મનિર્ભર ભારત'ના સ્વપ્નને સાકાર કરવાની દિશામાં એક મહત્વપૂર્ણ પગલું છે.

મહાદેવનો વસ્ત્ર પ્રસાદ પ્રાપ્ત કરો:

તમે પણ આ પવિત્ર પહેલનો હિસ્સો બની શકો છો. આ અનોખા અને આકર્ષક કુર્તા સોમનાથ પ્રસાદની વેબસાઇટ પર અથવા સ્ક્રીન પર આપેલા QR કોડને સ્કેન કરીને તમને ઉપલબ્ધ થશે.

https://somnathprasad.com//shop/category/kurta-20

હિન્દુસ્થાન સમાચાર / ભરતસિંહ જાદવ