અમરેલી, 27 સપ્ટેમ્બર (હિ.સ.): અમરેલી જિલ્લાના લીલીયા ખાતે કિસાન સેવા સહકારી મંડળી લિ.ની વાર્ષિક સભાનું આયોજન કરવામાં આવ્યું. આ સભામાં મોટી સંખ્યામાં સભ્યો, ખેડૂત પ્રતિનિધિઓ તથા આગેવાનો ઉપસ્થિત રહ્યા. કાર્યક્રમ દરમ્યાન છેલ્લા 8 વર્ષ દરમિયાન મંડળી દ્વારા કરાયેલા સેવાકીય તેમજ વિકાસાત્મક કાર્યોની વિગતવાર સમીક્ષા કરવામાં આવી, જે સાંભળીને દરેક સભ્યને ગૌરવની લાગણી અનુભવી.

સભામાં જણાવાયું કે કૃષિ ક્ષેત્રે મંડળી દ્વારા ખેડૂત ભાઈઓને ઉચ્ચ ગુણવત્તાવાળા બીજ, ખાતર તથા આધુનિક સાધનો ઉપલબ્ધ કરાવવામાં આવ્યા છે. સિંચાઈ સુવિધા સુધારવા માટે પ્રયત્નો થયા છે, તેમજ પ્રાકૃતિક ખેતી અને સજીવ ખેતી અંગે તાલીમ આપી ખેડૂતોને સશક્ત બનાવવામાં આવ્યા છે.

શિક્ષણ ક્ષેત્રે, મંડળી દ્વારા શાળાઓમાં આધુનિક સુવિધાઓ ઉભી કરવામાં આવી છે અને વિદ્યાર્થીઓને શૈક્ષણિક પ્રોત્સાહન આપવાની અનેક યોજનાઓ હાથ ધરવામાં આવી છે. આરોગ્ય ક્ષેત્રે ગ્રામજનોને પ્રાથમિક આરોગ્ય સેવા સુલભ બને તે માટે આરોગ્ય કેમ્પો અને જાગૃતિ કાર્યક્રમો યોજાયા છે.

સામાજિક સુરક્ષા ક્ષેત્રે ગરીબ અને જરૂરિયાતમંદ પરિવારોને સહાય, અનાજ વિતરણ તથા મહિલાઓ માટે સશક્તિકરણ કાર્યક્રમો મંડળીની કામગીરીમાં અગત્યનો ભાગ રહ્યા છે. આ કામગીરીના પરિણામે ગામ તથા આસપાસના વિસ્તારોમાં વિકાસનો સ્પર્શ અનુભવાઈ રહ્યો છે.

સભાના અંતે આગેવાનો તથા સભ્યો દ્વારા મંડળીના પ્રયાસોની પ્રશંસા કરવામાં આવી અને ભાવિ સમયમાં વધુ નવીન યોજનાઓ દ્વારા ખેડૂત અને સમાજજનોના વિકાસ માટે કાર્ય કરવાનું સંકલ્પ લેવામાં આવ્યું.

લીલીયા ખાતે યોજાયેલી કિસાન સેવા સહકારી મંડળીની વાર્ષિક સભા માત્ર સમીક્ષા પુરતી ન રહી, પરંતુ સેવાકીય કાર્યની ગૌરવસભર યાત્રાનું પ્રતિબિંબ બની.

---------------

હિન્દુસ્થાન સમાચાર / Gondaliya Abhishek Nandrambhai