મહેસાણા, 27 સપ્ટેમ્બર (હિ.સ.): મહેસાણાના પ્રાર્થના પરિસર સોસાયટીમાં આયોજિત નવરાત્રિ મહોત્સવ આ વર્ષે અનોખો બની રહ્યો, કારણ કે અહીં વેશભૂષા કાર્યક્રમનું ખાસ આયોજન કરવામાં આવ્યું હતું. આ કાર્યક્રમમાં નાના ભૂલકાંઓથી લઈને વડીલો સુધી સૌ કોઈએ ઉત્સાહભેર ભાગ લીધો હતો. પરંપરાગત વસ્ત્રો સાથે અવનવી વેશભૂષા ધારણ કરીને સૌએ ગરબે ઘૂમતા અનોખો રંગ ભરી દીધો હતો.
વિશેષતા એ રહી કે ખેલૈયાઓએ માત્ર શણગાર અને સુંદરતા પર જ ભાર મૂક્યો નહોતો, પરંતુ વિવિધ સામાજિક સંદેશાઓને પણ પોતાની વેશભૂષા દ્વારા રજૂ કર્યા હતા, જે સૌનું ધ્યાન ખેંચી લેતા હતા. નાના બાળકોની નિર્દોષ સ્મિતથી માંડીને યુવાનોની સર્જનાત્મકતા અને વડીલોનો ઉત્સાહ – સૌએ આ કાર્યક્રમને યાદગાર બનાવી દીધો હતો.
વડીલોએ પણ પરંપરાનું જીવંત પ્રતિબિંબ રજૂ કર્યું હતું. કેટલાક લોકોએ રાધા-કૃષ્ણ અને શિવ-પાર્વતી જેવા પૌરાણિક પાત્રોના વેશ ધારણ કર્યા, તો કેટલાકે જુદા જુદા રાજ્યોની સંસ્કૃતિ દર્શાવતા પોશાકો પહેરીને સૌને પ્રભાવિત કર્યા હતા. આ કાર્યક્રમમાં પરંપરા અને આધુનિકતાનું અદભૂત સંગમ જોવા મળ્યું, જે નવરાત્રિના ઉત્સવને વધુ રંગીન અને અર્થસભર બનાવી ગયું.
---------------
હિન્દુસ્થાન સમાચાર / RINKU AMITKUMAR THAKOR
