પાટણ, 17 જાન્યુઆરી (હિ.સ.)પાટણમાં વહેલી સવારે ગંભીર અકસ્માત સર્જાયો હતો, જેમાં શાકભાજી વેચીને પરત ફરતા બે સગા ભાઈઓને ટર્બો ટ્રકે ટક્કર મારતા બંનેના મોત નિપજ્યા હતા. એકનું ઘટનાસ્થળે જ મોત થયું હતું, જ્યારે બીજાનું સારવાર દરમિયાન અવસાન થયું હતું.

મળતી માહિતી મુજબ માંખરીયા વિસ્તારમાં રહેતા 32 વર્ષીય સુનિલ ભરતભાઈ પટણી અને 24 વર્ષીય અમિત ભરતભાઈ પટણી વહેલી સવારે પોતાના ખેતરમાં ઉગાવેલું શાકભાજી અંબિકા શાક માર્કેટમાં વેચવા ગયા હતા.

શાકભાજી વેચ્યા બાદ બંને ભાઈઓ છકડો રિક્ષામાં પરત ફરી રહ્યા હતા. આ દરમિયાન હારીજ ત્રણ રસ્તા પાસે પૂરઝડપે આવેલા ટર્બોએ છકડાને ટક્કર મારતા અકસ્માત અત્યંત ભયાનક બન્યો હતો અને છકડો રિક્ષાનો કચ્ચરઘાણ નીકળી ગયો હતો.

અકસ્માત બાદ આસપાસના લોકો દોડી આવ્યા હતા. સ્થાનિકોએ 108 એમ્બ્યુલન્સને જાણ કરતા EMT નિલેશ ચેતવાણી અને પાયલોટ જયસિંહ રાજપૂત દ્વારા અમિતને સારવાર અર્થે ખસેડવામાં આવ્યો હતો, પરંતુ સારવાર દરમિયાન તેનું પણ મોત થયું હતું.

બંને ભાઈઓ પરિણીત હતા અને મહેનત મજૂરી કરીને પરિવારનું ગુજરાન ચલાવતા હતા. સુનિલને ત્રણ બાળકો છે જ્યારે અમિતને એક બાળક છે. બે યુવાન દીકરાઓના અકાળ મોતથી સમગ્ર પટણી સમાજમાં શોકનો માહોલ છવાયો છે. પોલીસે ઘટનાની તપાસ શરૂ કરી છે.

હિન્દુસ્થાન સમાચાર / હાર્દિક રાઠોડ