મહેસાણા,19 જાન્યુઆરી (હિ.સ.) મહેસાણા શહેરના જાહેર માર્ગો પર ટ્રાફિક નિયમોનું પાલન કરતા જવાબદાર વાહનચાલકોનું મહેસાણા પોલીસ દ્વારા અભિવાદન કરવામાં આવ્યું હતું. આ અનોખી અને પ્રેરણાદાયી પહેલનો મુખ્ય હેતુ નાગરિકોમાં માર્ગ સલામતી અંગે સકારાત્મક સંદેશ પહોંચાડવાનો તથા નિયમોનું પાલન કરનારને પ્રોત્સાહન આપવાનો હતો.
આ અભિયાન દરમિયાન હેલ્મેટ, સીટબેલ્ટ, સ્પીડ લિમિટ, લેન શિસ્ત તથા સિગ્નલનું પાલન કરનાર વાહનચાલકોને ફૂલ, પ્રશસ્તિ કાર્ડ અને શુભેચ્છાઓ આપી સન્માનિત કરવામાં આવ્યા. સાથે સાથે માર્ગ અકસ્માત સમયે તાત્કાલિક મદદ પહોંચાડતી રાહવીર યોજના વિશે વિગતવાર માહિતી આપવામાં આવી. રાહવીર યોજના અંતર્ગત અકસ્માતમાં ઘાયલ વ્યક્તિને સમયસર સારવાર સુધી પહોંચાડનાર નાગરિકને સરકાર દ્વારા સન્માન અને પ્રોત્સાહન આપવામાં આવે છે—આ વાત પર ખાસ ભાર મૂકવામાં આવ્યો.
પોલીસ અધિકારીઓએ જણાવ્યું કે માર્ગ સલામતી માટે દંડ કરતા વધુ અસરકારક છે જાગૃતિ અને સહભાગિતા. નિયમોનું પાલન કરનાર નાગરિકો અન્ય માટે ઉદાહરણ બને છે અને શહેરમાં અકસ્માતોની સંખ્યા ઘટાડવામાં મદદરૂપ થાય છે. આ પહેલથી વાહનચાલકોમાં જવાબદારીની ભાવના વધશે અને મહેસાણા શહેરને વધુ સલામત બનાવવામાં સૌનો સહકાર મળશે—એવો વિશ્વાસ વ્યક્ત કરવામાં આવ્યો.
---------------
હિન્દુસ્થાન સમાચાર / RINKU AMITKUMAR THAKOR
