- રાજકોટ કોર્ટ પરિસરમાં તપાસ દરમિયાન SOG ટીમને એક ડ્રોન મળી આવ્યું

- હાઇકોર્ટ સહિત રાજ્યની 6 કોર્ટને ઉડાવી દેવાની ધમકી

અમદાવાદ,06 જાન્યુઆરી (હિ.સ.) ગુજરાત હાઈકોર્ટ, અમદાવાદ ભદ્ર કોર્ટ, સુરત, રાજકોટ અને આણંદની કોર્ટને બોમ્બથી ઉડાવવાની ધમકી મળતા ખડભડાટ મચ્યો છે, ત્યારે પોલીસ, BDDS અને ડોગ સ્ક્વોડે તપાસ શરૂ કરી છે. અનેક શહેરમાં હાલ સુરક્ષા વધારાઈ છે, કોર્ટ પરિસરો ખાલી કરાયા છે અને ન્યાયિક કાર્યવાહી સ્થગિત રાખવામાં આવી છે.

આજે હાઇકોર્ટ તથા રાજ્યના વિવિધ શહેરોની લોઅર કોર્ટને બોમ્બથી ઉડાવી દેવાની ધમકી મળી છે. જેમાં સુરત,આણંદ, રાજકોટ, અમદાવાદ અને ભરૂચની લોઅર કોર્ટને RDXથી ઉડાવી દેવાની ધમકી આપવામાં આવી છે.

આ ધમકી LTTE(લિબરેશન ટાઇગર ઓફ તમિલ ઇલમ) દ્વારા આપવામાં આવી છે. તેમજ તમામને એક જ પેટર્નથી ધમકીઓ આપી છે. LTTEના પૂર્વ સભ્યો સાથે મળીને કાશ્મીર ISKPના મેમ્બર્સે કોર્ટને નિશાન બનાવી છે.

ગુજરાતમાં ન્યાયતંત્રને નિશાન બનાવી કોર્ટને બોમ્બથી ઉડાવી દેવાની ધમકીનો આ સિલસિલો આજે સવારે સુરતની ગ્રામ્ય કોર્ટેથી શરૂ થયો હતો.

આજે સવારે એક નનામી ફોન કોલ આવ્યો હતો. જેમાં કોઈ અજાણ્યા શખ્શે કોર્ટને બોમ્બથી ઉડાવી દેવાની ધમકી આપી હતી, ત્યારે ઉચ્ચ પોલીસ અધિકારીઓ દોડતા થયા હતા. જે બાદ હાલ ગુજરાત હાઈકોર્ટ સહિત રાજકોટ ડિસ્ટ્રિક્ટ કોર્ટ, અમદાવાદ ભદ્ર કોર્ટ તથા આણંદમાં પણ કોર્ટને બોમ્બથી ઉડાવી દેવાની ધમકી મળતા ભારે હડકંપ મચ્યો છે.

રાજકોટ કોર્ટ પરિસરમાં તપાસ દરમિયાન SOG ટીમને એક ડ્રોન મળી આવ્યું હતું જે ડ્રોન મહેસાણાના વકીલ સાથે લઈને આવ્યા હોવાનું સામે આવ્યું છે. ડ્રોન અંગે તપાસ બૉમ્બસ્ક્વોડ તેમજ ડોગ સ્ક્વોડ સાથે કરવામાં આવી હતી જો કે તેમાં કોઈ સ્ફોટક વસ્તુ ઇન્સ્ટોલ ન હોવાનું સામે આવતા પોલીસે વકીલની ડ્રોન બાબતે પુછપરછ હાથ ધરી હતી.

સુરત ડિસ્ટ્રિક્ટ કોર્ટને મોડી રાતે 2 વાગ્યે અંગ્રેજીમાં મેઈલ કરી RDXથી ઉડાવી દેવાની ધમકી આપવામાં આવતા ચકચાર મચી ગઈ છે. આ ઘટનાની વિગત એવી છે કે, કોર્ટના ઓફિશિયલ મેઈલ આઈડી પર વહેલી સવારે એક ધમકીભર્યો સંદેશો આવ્યો હતો. જ્યારે કોર્ટના કર્મચારીઓએ સવારે ફરજ પર આવીને આ મેઈલ તપાસ્યો, ત્યારે તેમાં કોર્ટ બિલ્ડિંગને વિસ્ફોટકોથી ઉડાવી દેવાની ગંભીર ચેતવણી લખેલી હતી, જેનાથી તંત્રમાં દોડધામ મચી ગઈ હતી.

અમદાવાદ ગ્રામ્ય કોર્ટ બાદ આજે એટલે કે 24 કલાકની અંદર વધુ એક કોર્ટને ધમકી મળી છે.

અમદાવાદ સિટી સિવિલ એન્ડ સેશન્સ કોર્ટના રજિસ્ટ્રી વિભાગને બોમ્બથી ઉડાવવાની ધમકી મળી છે. આ ધમકીને પગલે કોર્ટ કાર્યવાહી કરાઈ સ્થગિત કરવામાં આવી છે. તેમજ બોમ્બ સ્ક્વોડ અને ડોગ સ્ક્વોડ સહિતની ટીમો કોર્ટમાં તપાસ કરી છે.

રાજકોટ કોર્ટને બોમ્બથી ઉડાવી દેવા ધમકી મળી છે. આ અંગે કોર્ટના સિક્યુરિટી ઇન્ચાર્જ દ્વારા પોલીસ કંટ્રોલને જાણ કરવામાં આવી છે. કંટ્રોલ દ્વારા યુનિવર્સિટી પોલીસ તેમજ બૉમ્બ સ્ક્વોડ, ડોગ સ્ક્વોડ અને SOGને જાણ કરવામાં આવી છે. હાલ પોલીસે કોર્ટ પરિસર ખાલી કરાવી તપાસ હાથ ધરી છે.

મેઈલની ગંભીરતાને ધ્યાને રાખીને કોર્ટ સ્ટાફ દ્વારા તાત્કાલિક પ્રિન્સિપલ જજને જાણ કરવામાં આવી હતી. જજ સાહેબે આ બાબતને અત્યંત સંવેદનશીલ ગણીને સમયનો સહેજ પણ બગાડ કર્યા વિના તુરંત જ પોલીસ વિભાગને મેઈલ વિશે વાકેફ કરવા અને કડક સુરક્ષા તપાસ હાથ ધરવા માટે આદેશ આપ્યા હતા. જજ સાહેબના આદેશ બાદ કોર્ટ પરિસરમાં પોલીસ છાવણીમાં ફેરવાઈ ગયું હતું.

પોલીસને જાણ થતા જ સ્થાનિક પોલીસ, ક્રાઈમ બ્રાન્ચ અને એસોજી (SOG)ની ટીમો તાત્કાલિક સુરત ડિસ્ટ્રિક્ટ કોર્ટના પરિસરે પહોંચી ગઈ હતી. બોમ્બ સ્ક્વોડ અને ડોગ સ્ક્વોડની મદદથી સુરત ડિસ્ટ્રિક્ટ કોર્ટ અને ફાસ્ટટ્રેક કોર્ટની બિલ્ડિંગમાં સઘન ચેકિંગ શરૂ કરવામાં આવ્યું હતું. પોલીસની અલગ-અલગ ટીમો દ્વારા પરિસરના ખૂણેખૂણાની તપાસ કરવામાં આવી હતી જેથી કોઈ અઘટિત ઘટનાને ટાળી શકાય.

હિન્દુસ્થાન સમાચાર / હર્ષ શાહ