ભાવનગર,10 ઓક્ટોબર (હિ.સ.)સનાતન ધર્મના દિવ્ય સંદેશ અને સૌના મંગળની ભાવના સાથે પૂજ્ય મોરારિબાપુ દ્વારા આયોજિત ‘ભારત સ્વસ્તિક યાત્રા’ રામકથાનો કન્યાકુમારીથી ઉમંગભેર પ્રારંભ થયો છે. આદિ શંકરાચાર્યજીને ભાવવંદના અર્પણ કરીને શરૂ થયેલી આ યાત્રાનો મુખ્ય હેતુ દેશભરમાં સનાતન સંસ્કૃતિ, આધ્યાત્મિકતા અને સ્વસ્તિનો સંદેશ પ્રસરાવવાનો છે.

કન્યાકુમારી ખાતે પ્રથમ દિવસની રામકથાના પ્રારંભ પહેલાં રેલવે સ્ટેશન પર યાત્રાના શુભારંભનો વિશેષ કાર્યક્રમ યોજાયો હતો. આ પ્રસંગે મોટી સંખ્યામાં ભાવિક ભક્તો અને શ્રદ્ધાળુઓ જોડાયા હતા. સમગ્ર કાર્યક્રમ દરમિયાન ભક્તિમય વાતાવરણ જોવા મળ્યું હતું.

આ પ્રસંગે પૂજ્ય મોરારિબાપુએ પોતાના પ્રાસંગિક ઉદ્બોધનમાં યાત્રા સાથે જોડાયેલા ચાર મહત્ત્વપૂર્ણ તત્ત્વો ત્યાગ, તપ, તિતિક્ષા અiને તર્પણનો વિશેષ ઉલ્લેખ કર્યો હતો. તેમણે આ ચારેય પાસાંને આધ્યાત્મિક જીવનની મહત્ત્વપૂર્ણ ભાવનાઓ તરીકે રજૂ કર્યાં હતાં.

આ રામકથામાં દેશ-વિદેશના અનેક ભાવિક ભક્તો જોડાયા છે. શ્રોતાઓને કથાશ્રવણનો લાભ મળી રહે તે માટે ‘કૈલાસ’ અને ‘ચિત્રકૂટ’ નામની બે વિશેષ રેલગાડીઓ દ્વારા યાત્રાનું આયોજન કરવામાં આવ્યું છે.

કન્યાકુમારીથી કેદારનાથ સુધીની આ અનોખી કથાયાત્રા દ્વારા આધ્યાત્મિક ચેતના, ભારતીય સંસ્કૃતિ અને સૌના કલ્યાણનો સંદેશ જનજન સુધી પહોંચાડવાનો પ્રયાસ કરવામાં આવી રહ્યો છે.

---------------

હિન્દુસ્થાન સમાચાર / DISHANT NANDRAMBHAI GONADLIYA