અમરેલી,14 ઓક્ટોબર (હિ.સ.)

અમરેલી જિલ્લાના લાઠી તાલુકાના પાડરશિંગા ગામની શાળાના ચાર વિદ્યાર્થીઓએ રમતગમત ક્ષેત્રે ઉત્કૃષ્ટ પ્રદર્શન કરીને ગામ અને શાળા પરિવારનું ગૌરવ વધાર્યું છે. શાળાના ચાર બાળકોની રાજ્ય કક્ષાના ખેલમહાકુંભ માટે પસંદગી થતાં ગામમાં ખુશીનો માહોલ જોવા મળી રહ્યો છે.

રાજ્ય ખેલમહાકુંભમાં પસંદગી મેળવવી એ વિદ્યાર્થીઓની મહેનત, લગન અને રમતગમત પ્રત્યેના સમર્પણનું પરિણામ છે. ગ્રામ્ય વિસ્તારની શાળામાં અભ્યાસ કરતાં વિદ્યાર્થીઓએ રાજ્ય કક્ષા સુધી પહોંચીને અન્ય બાળકો માટે પણ પ્રેરણારૂપ ઉદાહરણ પૂરું પાડ્યું છે.

વિદ્યાર્થીઓની આ સફળતા પાછળ તેમની નિયમિત મહેનત, શિક્ષકોનું માર્ગદર્શન અને શાળા પરિવારનો સહયોગ મહત્ત્વપૂર્ણ બની રહ્યો છે. રમતગમત વિદ્યાર્થીઓમાં શિસ્ત, આત્મવિશ્વાસ, ટીમવર્ક અને નેતૃત્વ જેવા ગુણો વિકસાવવામાં મદદરૂપ બને છે. ત્યારે પાડરશિંગા શાળાના ચાર વિદ્યાર્થીઓની પસંદગી અન્ય વિદ્યાર્થીઓને પણ રમતગમત ક્ષેત્રે આગળ વધવા માટે પ્રેરણા આપશે.

આ સિદ્ધિથી પાડરશિંગા ગામ સહિત સમગ્ર લાઠી તાલુકામાં ગૌરવની લાગણી ફેલાઈ છે. શાળાના વિદ્યાર્થીઓ રાજ્ય કક્ષાએ પોતાની પ્રતિભા દર્શાવીને વધુ સફળતા મેળવે તેવી સૌ કોઈ આશા વ્યક્ત કરી રહ્યા છે.

હિન્દુસ્થાન સમાચાર / Gondaliya Abhishek Nandrambhai