પાટણ, 14 ઓક્ટોબર (હિ.સ.)પાટણ જિલ્લાના હારીજ પોલીસ સ્ટેશનના પી.આઈ. એ.જે. મહેરીયાના દીકરાનો જન્મદિવસ અનોખી રીતે ઉજવવામાં આવ્યો હતો. જન્મદિવસની ઉજવણીને સેવાકાર્ય સાથે જોડીને હારીજ તાલુકાની શાળાઓમાં વિવિધ પ્રવૃત્તિઓનું આયોજન કરવામાં આવ્યું હતું. આ પ્રસંગે વિદ્યાર્થીઓને ભોજન કરાવી સામાજિક સેવાનો સુંદર સંદેશ આપવામાં આવ્યો હતો.

હારીજ તાલુકાની સરેલ સરકારી માધ્યમિક શાળામાં ધોરણ 9 અને 10માં અભ્યાસ કરતા વિદ્યાર્થીઓ માટે ભોજનની વ્યવસ્થા કરવામાં આવી હતી. આ સાથે વિદ્યાર્થીઓને સાયબર ક્રાઈમ, ઓનલાઈન છેતરપિંડીથી બચવાના ઉપાયો તેમજ ટ્રાફિકના નિયમો સહિત પોલીસને લગતા વિવિધ કાયદાઓ વિશે વિસ્તૃત માર્ગદર્શન આપવામાં આવ્યું હતું. આ માર્ગદર્શનથી વિદ્યાર્થીઓમાં કાયદા પ્રત્યે જાગૃતિ વધે અને તેઓ સુરક્ષિત રીતે ડિજિટલ માધ્યમોનો ઉપયોગ કરતા થાય તેવો હેતુ રહ્યો હતો.

આ સેવાકીય કાર્યક્રમ બદલ શાળાના આચાર્ય જયંતિભાઈ દેસાઈ સહિત શિક્ષક પરિવારે હારીજ પી.આઈ. એ.જે. મહેરીયા અને પોલીસ સ્ટેશનની ટીમનું સન્માન કરીને આભાર વ્યક્ત કર્યો હતો. આ પ્રસંગે શિક્ષક ધવલદાન ગઢવી અને કિંજલબેન ચૌધરી સહિત શાળાના શિક્ષકોએ પોલીસની આ પહેલને બિરદાવી હતી. જન્મદિવસની ઉજવણીને સમાજસેવા, શિક્ષણ અને કાયદાકીય જાગૃતિ સાથે જોડવાના આ પ્રયાસની સરાહના કરવામાં આવી હતી.

હિન્દુસ્થાન સમાચાર / હાર્દિક રાઠોડ