કૃત્રિમ બુદ્ધિમત્તાથી લઈને હરિત ઊર્જા અને ગ્રામ્ય વિકાસ સુધીના વિષયો બન્યા આકર્ષણનું કેન્દ્ર; વિદ્યાર્થીઓમાં વૈજ્ઞાનિક અભિગમ અને સંશોધનવૃત્તિ વિકસાવવાનો પ્રયાસ

કચ્છ, 14 ઓક્ટોબર (હિ.સ.) : વિદ્યાર્થીઓમાં વૈજ્ઞાનિક વિચારસરણી, સંશોધન પ્રત્યેની જિજ્ઞાસા અને સર્જનાત્મકતાને પ્રોત્સાહન આપવાના હેતુથી ગાંધીધામ ખાતે બાળ વૈજ્ઞાનિક પ્રદર્શન 2026-27નું આયોજન કરવામાં આવ્યું હતું. જી.સી.ઈ.આર.ટી. ગાંધીનગરની પ્રેરણાથી મહારાણી ગંગાબા સાહેબ જિલ્લા શિક્ષણ અને તાલીમ ભવન, ભુજ, જિલ્લા શિક્ષણાધિકારી કચેરી, ભુજ તથા દ્રોણાચાર્ય શાળા વિકાસ સંકુલ, ગાંધીધામના સંયુક્ત ઉપક્રમે યોજાયેલા આ પ્રદર્શનમાં 50 શાળાઓની કુલ 68 કૃતિઓ રજૂ કરવામાં આવી હતી.

પ્રદર્શનમાં ગાંધીધામનાં ધારાસભ્ય માલતીબેન મહેશ્વરી મુખ્ય અતિથિ તરીકે ઉપસ્થિત રહ્યાં હતાં. આ ઉપરાંત જિલ્લા શિક્ષણાધિકારી સંજયભાઈ પરમાર, શિક્ષણ નિરીક્ષકો પી. જી. ઝાલા, મહેશદાન ગઢવી અને એ. જી. વાઘેલા, મહાનગરપાલિકાની સ્ટેન્ડિંગ કમિટીના ચેરમેન તેજસભાઈ શેઠ, દંડક સુરેશભાઈ ધુવા તથા વોર્ડ નંબર 8નાં કોર્પોરેટર મીનુબેન ગોયલ સહિતના મહાનુભાવોએ ઉપસ્થિત રહી વિદ્યાર્થીઓને પ્રોત્સાહિત કર્યા હતા.

વિદ્યાર્થીઓએ પોતાની કૃતિઓ દ્વારા વિજ્ઞાન અને ટેક્નોલોજીના વિવિધ ઉપયોગો રજૂ કરીને આસપાસની સમસ્યાઓના નવીન ઉકેલો શોધવાની ક્ષમતા દર્શાવી હતી. પ્રદર્શનમાં કૃત્રિમ બુદ્ધિમત્તા, ગણિતીય મોડેલિંગ, હરિત ઊર્જા, પર્યાવરણ સંરક્ષણ, આરોગ્ય, સ્વચ્છતા, પરંપરાગત કૃષિ પદ્ધતિઓ, ગ્રામ્ય પરિવર્તન અને આપત્તિ વ્યવસ્થાપન જેવા વિષયોને આવરી લેવામાં આવ્યા હતા. આ વિષયોના માધ્યમથી વિદ્યાર્થીઓને વર્તમાન સમયના પડકારો સમજવાની અને વિજ્ઞાન આધારિત ઉકેલો વિચારવાની તક મળી હતી.

દરેક કૃતિ સાથે માર્ગદર્શક શિક્ષક અને બે વિદ્યાર્થીઓ જોડાયેલા હતા. કૃતિઓનું મૂલ્યાંકન તોલાણી આર્ટ્સ એન્ડ સાયન્સ કોલેજના પ્રાધ્યાપકો તથા પ્રાથમિક વિભાગના અનુભવી શિક્ષકોની નિર્ણાયક ટીમ દ્વારા કરવામાં આવ્યું હતું. કૃતિઓની વૈજ્ઞાનિક સમજ, નવીનતા, ઉપયોગિતા, સર્જનાત્મકતા અને પ્રસ્તુતિને મૂલ્યાંકનના મુખ્ય આધાર બનાવવામાં આવ્યા હતા.

પ્રદર્શનના આયોજનમાં વિવિધ શૈક્ષણિક સંસ્થાઓ, દાતાઓ, અધિકારીઓ, આચાર્યો અને શિક્ષકોએ સહયોગ આપ્યો હતો. કાર્યક્રમનું સંચાલન એમ. પી. પટેલ કન્યા વિદ્યાલયનાં આચાર્ય કૈલાશબેન પિત્રોડાએ કર્યું હતું.

આ પ્રદર્શન વિદ્યાર્થીઓ માટે માત્ર પોતાની પ્રતિભા રજૂ કરવાનું મંચ નહીં, પરંતુ તાર્કિક વિચારસરણી, ટીમવર્ક, આત્મવિશ્વાસ અને સંશોધનક્ષમતા વિકસાવવાની શૈક્ષણિક તક પણ બન્યું હતું. આવી પ્રવૃત્તિઓથી શાળાકક્ષાએ વિજ્ઞાન પ્રત્યે રસ વધવાની સાથે ભવિષ્યના સંશોધકો અને નવીન વિચારકો તૈયાર થવાની દિશામાં પ્રોત્સાહન મળે છે.

---------------

હિન્દુસ્થાન સમાચાર / Rohit Ramjibhai Padhiyar