- ખેંગારપરની સીમમાં નર્મદા કેનાલમાંથી મળી આવી હતી તાજા જન્મેલા બાળકની લાશ; ટેકનિકલ એનાલિસિસ અને હ્યુમન સોર્સિસની મદદથી રાપર પોલીસે ત્રણ શખ્સોને ઝડપી કાયદેસરની કાર્યવાહી હાથ ધરી.

કચ્છ, 17 ઓક્ટોબર (હિ.સ.) : કચ્છ જિલ્લાના રાપર તાલુકામાં નવજાત શિશુને ત્યજી દેવાના અને તેના મોતના ગંભીર પ્રકરણમાં રાપર પોલીસે તપાસના આધારે ત્રણ આરોપીઓને ઝડપી પાડ્યા છે. ખેંગારપર ગામની સીમમાં આવેલી નર્મદા કેનાલમાંથી તાજા જન્મેલા નવજાત શિશુનો મૃતદેહ મળી આવ્યા બાદ સમગ્ર મામલે પોલીસ દ્વારા તપાસનો ધમધમાટ શરૂ કરવામાં આવ્યો હતો. આ સંવેદનશીલ ઘટનાનો ભેદ ઉકેલવા માટે પોલીસે ટેકનિકલ એનાલિસિસ અને માનવીય બાતમીદારોની મદદથી તપાસ આગળ ધપાવી હતી.

પ્રાપ્ત પોલીસ વિગતો અનુસાર, તા. 15 ઓક્ટોબર, 2026ના રોજ રાપર પોલીસ સ્ટેશનમાં આ બનાવ અંગે ગુનો નોંધવામાં આવ્યો હતો. ખેંગારપર ગામની સીમમાં આવેલી નર્મદા કેનાલમાંથી નવજાત શિશુનો મૃતદેહ મળી આવતાં પોલીસ તંત્રએ ઘટનાની ગંભીરતાને ધ્યાનમાં રાખીને તપાસ શરૂ કરી હતી. બાળકના મોત પાછળનાં સંજોગો અને આ બનાવમાં સંડોવાયેલા લોકો સુધી પહોંચવા માટે પોલીસ દ્વારા વિવિધ દિશામાં તપાસ હાથ ધરવામાં આવી હતી.

તપાસ દરમિયાન ટેકનિકલ એનાલિસિસ અને હ્યુમન સોર્સિસના આધારે પોલીસે નારણપર ગામના રામજીભાઈ રમણભાઈ કોલી (29), મનજીભાઈ રમણભાઈ કોલી (28) અને કાંતાબેન હોથીભાઈ રાઠોડને ઝડપી પાડ્યા હતા. ત્રણેય સામે ગુનાના સંદર્ભમાં કાયદેસરની કાર્યવાહી હાથ ધરવામાં આવી છે.

આ સમગ્ર કામગીરી પોલીસ ઇન્સ્પેક્ટર આર.એલ. ખટાણા, પોલીસ સબ ઇન્સ્પેક્ટર બી.એસ. ચૌધરી તથા રાપર પોલીસ સ્ટેશનના સ્ટાફ દ્વારા કરવામાં આવી હતી. નવજાત શિશુના મોત જેવા ગંભીર પ્રકરણમાં પોલીસની તપાસ બાદ ત્રણ વ્યક્તિઓની ધરપકડ થતાં આ કેસમાં આગળની તપાસ પર સૌની નજર મંડાઈ છે.

---------------

હિન્દુસ્થાન સમાચાર / Rohit Ramjibhai Padhiyar