અમદાવાદ,27 ઓકટોબર (હિ.સ.) વન વિભાગના અધિકારીને ઘરે બોલાવીને માર મારવા, ધમકાવવા અને હવામાં ગોળીબાર સંદર્ભે જેલમાં બંધ આમ આદમીના પાર્ટીના ધારાસભ્ય ચૈતર વસાવાને સુપ્રીમ કોર્ટમાં ત્રણ દિવસના હંગામી જામીન મળ્યા છે.

બીમાર ભાઈને મળવા માટે અગાઉ ચૈતર વસાવાએ ગુજરાત હાઈકોર્ટમાં અરજી કરી હતી. જે બાદ હાઈકોર્ટે એક દિવસના જામીન આપ્યા હતા. જો કે આ હુકમને હાઈકોર્ટમાં ચેલેન્જ કરાયો હતો. ત્યારે સુપ્રીમ કોર્ટે 3 દિવસના હંગામી જામીન મંજૂર કર્યાં છે.

એડવોકેટ પુનીત જૂનેજાએ જણાવ્યું છે કે, ચૈતર વસાવાને 3 દિવસના હંગામી જામીન સુપ્રીમ કોર્ટે આપ્યા છે. ચૈતર વસાવા વતી સુપ્રીમ કોર્ટમાં કપિલ સિબ્બલ ઉપસ્થિત રહ્યા હતા

12 ઓક્ટોબર, 2026એ ધારાસભ્ય ચૈતર વસાવાના નાનાભાઈ શાંતિલાલ વસાવાએ ઝેરી દવા પી આપઘાતનો પ્રયાસ કર્યો હતો. જે બાદ તેમને સુરતની નવી સિવિલ હોસ્પિટલમાં ખસેડાયા હતા. આ મામલે નિઝર વિભાગના નાયાબ પોલીસ અધિક્ષક ઈશ્વર પરમારે જણાવ્યું હતું કે, પ્રાથમિક તપાસ કરતા પતિ-પત્ની વચ્ચે ઘર કંકાસ હતો, જેને કારણે આ પગલું ભર્યું હતું.

નવેમ્બર 2023માં ચૈતર સાથે તેમના પત્ની શકુંતલા વસાવા સહિતના આરોપીઓ સામે નર્મદા પોલીસે જમીન બાબતે ફોરેસ્ટ વિભાગના ઓફિસરને ઘરે બોલાવીને માર મારવા, ધમકાવવા અને હવામાં ગોળીબાર સંદર્ભે આઇપીસી અને આર્મ્સ એકટ વગેરે મુજબ ગુનો નોંધ્યો હતો. ત્યાર બાદ નર્મદાની કોર્ટે ચૈતર વસાવા અને તેમના પત્ની શકુંતલા વસાવા સહિત કુલ 9 આરોપીને 7 વર્ષની કેદની સજા ફટકારી હતી. 23 જૂન, 2026ના રોજ વડોદરા સેન્ટ્રલ જેલમાં મોકલવામાં આવ્યા હતા. જો કે છેલ્લે સપ્ટેમ્બર, 2026માં વિધાનસભા સત્રમાં હાજરી આપવા હાઈકોર્ટે 7 દિવસના જામીન આપ્યા હતા.

હિન્દુસ્થાન સમાચાર / હર્ષ શાહ