- રાવલપિંડી-લાહોરથી ઇ-મેઇલ ઓપરેટ થયાનો ઘટસ્ફોટ.

- ક્રિપ્ટોકરન્સી ચૂકવી હેક થયેલા ઇ-મેઇલ ખરીદાયા.

અમદાવાદ,28 ઓકટોબર (હિ.સ.) : અમદાવાદમાં વારંવાર ઇ-મેલ દ્વારા આપવામાં આવતી બોમ્બ બ્લાસ્ટની ધમકીમાં સમગ્ર આંતરરાષ્ટ્રીય ષડયંત્ર સામે આવ્યું છે. જેની પાછળ પાકિસ્તાન અને બાંગ્લાદેશનું નેટવર્ક સક્રિય હોવાનું સામે આવ્યું છે.

અમદાવાદ શહેરની સ્કૂલ, એએમસી ઓફિસ, ગુજરાત હાઇકોર્ટ, સિવિલ કોર્ટ તેમજ નરેન્દ્ર મોદી ક્રિકેટ સ્ટેડિયમ સહિત કુલ 16 જેટલા સ્થળોને બોમ્બ બ્લાસ્ટથી ઉડાવી દેવાની ધમકીભર્યા ઇમેઇલ્સ મોકલવા પાછળ પાકિસ્તાન અને બાંગ્લાદેશનું નેટવર્ક સક્રિય હોવાનું સામે આવ્યું છે.

પોલીસ મહાનિર્દેશક જી.એસ.મલિક અને ઉચ્ચ પોલીસ અધિકારીઓના માર્ગદર્શન હેઠળ સાયબર ક્રાઇમ પોલીસે બે અલગ-અલગ ગુના નોંધી તપાસ હાથ ધરતાં સમગ્ર આંતરરાષ્ટ્રીય ષડયંત્ર સામે આવ્યું છે. ટેલિગ્રામ અને વોટ્સએપ ગ્રૂપ મારફતે હેક થયેલા ઇ-મેઇલ એકાઉન્ટ ક્રિપ્ટોકરન્સીમાં પૈસા ચૂકવી ખરીદીને તહેવારો ટાણે દહેશત ફેલાવવા આ ઈમેઇલ મોકલવામાં આવ્યા હતા.

સાયબર ક્રાઈમ ડીસીપી લવિના સિન્હાએ જણાવ્યું હતું કે, 7 તારીખે રોજ Denise Long તથા wj kenના નામની ખોટી ઓળખ ઊભી કરી, bonnieebanks49@gmail.com અને kwajlds@gmail.com પરથી ધમકીભર્યા ઇ-મેઇલ્સ મોકલાયા હતા. જેમાં 'Time 8:00 AM at Gujarat Schools @11:11AM' તથા ખાલિસ્તાની લખાણો સાથે સ્કૂલો-10, મેયર ઓફિસ-1, ગુજરાત હાઇકોર્ટ, સોલા, મેટ્રો ધી કોર્ટ, ધી કોર્ટ, ડિસ્ટ્રિક્ટ સેશન્સ કોર્ટ અમદાવાદ શહેર-4 તથા નરેન્દ્ર મોદી ક્રિકેટ સ્ટેડિયમ-1 મળી કુલ 16 જગ્યાએ બોમ્બ બ્લાસ્ટની ધમકી આપવામાં આવી હતી. તપાસ દરમિયાન ટીમોએ અલગ-અલગ સ્કૂલો અને કોર્ટ સંકુલની વિઝિટ કરી જી-મેઇલના હેડર મેળવ્યા હતા.

ત્યારબાદ 27 ઓક્ટોબરના રોજ reduak079@gmail.com પરથી ફરી ધમકીભર્યો ઇ-મેઇલ આવ્યો હતો. જેમાં શહેરની 14 શાળાઓ, મેયર ઓફિસ દાણાપીઠ, ગુજરાત હાઇકોર્ટ, મેટ્રો કોર્ટ, ઘી કાંટા કોર્ટ, સિટી સિવિલ કોર્ટ તથા નરેન્દ્ર મોદી ક્રિકેટ સ્ટેડિયમ સહિત 19 સ્થળોનો ઉલ્લેખ હતો. આ અંગે પણ સાયબર ક્રાઇમમાં બીજો ગુનો નોંધી વિગતો મંગાવતાં ઇમેઇલનું કનેક્શન રંગપુર, બાંગ્લાદેશ અને લાહોર, પાકિસ્તાનથી ઓપરેટ થયાનું ખુલ્યું હતું.

અગાઉ ખાલિસ્તાની સંગઠનના નામે આવેલી ધમકીઓની તપાસમાં પશ્ચિમ બંગાળમાંથી એક આરોપી પકડાયો હતો. તેની પૂછપરછમાં ચોંકાવનારો ખુલાસો થયો હતો કે, આરોપીએ હેક થયેલા જી-મેઇલ એકાઉન્ટ્સ બાંગ્લાદેશના શખ્સને વેચ્યા હતા.

બાંગ્લાદેશના એ શખસે આ એકાઉન્ટ પાકિસ્તાનના શખ્સને વેચ્યા હતા અને તેના બદલામાં ક્રિપ્ટોકરન્સી મારફતે પેમેન્ટ ચૂકવાયું હતું. પાકિસ્તાની તત્વો ભારતમાં તહેવારો અને મહત્વપૂર્ણ આયોજનો વખતે ભયનો માહોલ ઊભો કરવા ટેલિગ્રામ-વોટ્સએપથી આવા કોમ્પ્રોમાઇઝ્ડ ઇ-મેઇલ ખરીદી રહ્યા છે.

હિન્દુસ્થાન સમાચાર / હર્ષ શાહ