- 1 મહિનાના બોયની જ ચોરી કરવાનો ટાર્ગેટ રાખતા

અમદાવાદ,06 ઓકટોબર (હિ.સ.) અમદાવાદમાં શ્રમજીવી પરિવારનું બાળકના ચોરીને કેશમાં પોલીસ ત્વરિત કાર્યવાહી કરી 38 કલાકે પરિવારને પરત મળ્યું હતું જેમાં પોલીસ બાળ તસ્કરી રેકેટનો ઘટસ્ફોટ કરી અમદાવાદી યુવતી,બે સગીર સહિત યુપીના શખસની ધરપકડ કરી. અમદાવાદના ન્યૂ રાણીપ વિસ્તારમાંથી 2 ઓક્ટોબરે ચોરી થયેલું શ્રમજીવી પરિવારનું બાળક 38 કલાકે પરિવારને પરત મળ્યું હતું. આ બાળકને ઉઠાવી જનાર યુવતી, બે સગીર અને યુપીના એક આરોપીની ક્રાઈમ બ્રાન્ચે બાળ તસ્કરી રેકેટમાં ધરપકડ કરી છે. આરોપીઓએ 10 લાખમાં એજન્ટને બાળક આપવાનું નક્કી કર્યું હતું.

બાળકને યુપીમાં નિઃસંતાન દંપતીને વેચવાનું હતું. આરોપીઓએ આ બાળકને ઉઠાવ્યા પહેલાં સોલા સિવિલમાં ચોરીનો પ્રયાસ કર્યો હતો, જેમાં બાળકી નીકળતા ચોરી માંડી વાળી હતી જે બાદ રાણીપમાંથી બોયને ઉઠાવી લીધો હતો. આ ટોળકી 1 મહિનાના બોયની ચોરી કરવાનો જ ટાર્ગેટ રાખતા હતાં.

2 ઓક્ટોબરે સવારે 2 વાગે અહુલવાડિયા તળાવ પાસે ફૂટપાથ સુતા દંપતીનું 37 દિવસનું બાળક અજાણી વ્યક્તિ ખાટલામાંથી ઉઠાવીને લઈ ગયું હતું. દંપતી સવારે 3:15 વાગે ઊઠતા બાળક ચોરી થયાની જાણ થઈ હતી, જેથી પોલીસને જાણ કરવામાં આવી હતી.

સાબરમતી પોલીસ સ્ટેશનની ટીમ સ્થળ પર પહોંચી હતી. ઉચ્ચ અધિકારીને જાણ થતા આ કેસમાં સાબરમતી પોલીસ,ક્રાઈમ બ્રાન્ચની 6 ટીમ,ઝોન 2 એલસીબી, ઝોન 3 એલસીબી સહિત 100 જેટલા અધિકારી કર્મચારી તપાસમાં જોડાયા હતા.

રાતોરાત રેલવે સ્ટેશન અને બસ સ્ટેશન પર ચેકીંગ હાથ ધરી નાકાબંધી કરી હતી.3 ઓક્ટોબરે સાંજે 4 વાગે આ બાળક તળાવ પાસેથી જ મળી આવ્યું હતું.પોલીસને અજાણ્યા વ્યક્તિએ બાળક અંગે જાણ કરતા ટીમ સ્થળ પર પહોંચી હતી, જેથી પોલીસે બાળકને માતા પિતાને બતાવ્યું હતું જે બાદ બાળક સોંપવામાં આવ્યું હતું. ત્યારબાદ એક એક્ટિવા પર આવેલી યુવતીએ બાળકને ઉઠાવ્યો હોવાના સીસીટીવી ફૂટેજ સામે આવ્યા હતા, જેના આધારે પોલીસે યુવતીની તપાસ હાથ ધરી હતી, ચોરી કરનાર યુવતી જીનલ પરમાર રાણીપમાંથી જ મળી આવી હતી. પોલીસે જીનલની ધરપકડ કર્યા બાદ પૂછપરછ હાથ ધરી હતી.

જીનલે આ બાળક ચોરીના રેકેટમાં અન્ય બે સગીર હોવાનું પણ જણાવ્યું હતું જેથી પોલીસે બે સગીરની પણ અટકાયત કરી હતી. જીનલે પોલીસને જણાવ્યું હતું કે, તે અગાઉ નોઇડામાં ઝેપટો કંપનીમાં કામ કરતી હતી ત્યારે બે સગીર પણ કામ કરતાં હતા અને ભુવનેશ નામનો યુવક પણ કામ કરતો હતો. ભુવનેશે જીનલને એક મહિનાનું બાળક શોધવા જણાવ્યું હતું. જીનલ બાળક લઈ આપે તો તેને અને બે સગીરને 2-2 લાખ રૂપિયા આપવા જણાવ્યું હતું.

જીનલે અમદાવાદમાં અલગ અલગ વિસ્તારમાં બે સગીર સાથે મળીને બાળક શોધવાનું શરૂ કર્યું હતું. સોલા સિવિલમાં જીનલ બાળક શોધવા ગઈ હતી ત્યારે એક બાળક પર નજર પડી હતી પરંતુ તે બાળકી હોવાથી તેની ચોરી ન કરી જે બાદ રાતે મોડા ન્યૂ રાણીપના તળાવ પાસે માતા પિતા સાથે સૂઈ ગયેલું બાળક દેખાતા બાળકની ચોરી કરી હતી.

ચોરી કરીને ત્રણેય જણા બાળક લઈને સાબરમતી રેલવે સ્ટેશનથી નોઇડા જવાના હતા, પરંતુ રાતે જ રેલવે સ્ટેશન પર પોલીસની ચેકીંગ દેખાતા ત્યાંથી નીકળી ગયા હતા. લગભગ 38 કલાક જેટલું બાળક સાથે રાખ્યું હતું. પોલીસ ચેકીંગ હોવાથી બાળક લઈ જઈ શકાય તેમ ન્હોતું જેથી બાળકને તળાવ પાસે જ લાવારીસ હાલતમાં મૂકી દીધું હતું.

સમગ્ર મામલે ભુવનેશની પણ યુપીથી ધરપકડ કરવામાં આવી છે. ભુવનેશે પોલીસ સમક્ષ કબૂલાત કરી હતી કે તેને આ બાળક એક સગીર વયના વ્યક્તિને આપવાનું હતું અને સગીર બાળક એક નિઃસંતાન દંપતીને આપવાનો હતો.

‘આ સમગ્ર કેસમાં બે સગીર, 21 વર્ષીય જીનલ અને 23 વર્ષીય ભુવનેશની ધરપકડ થઈ ચૂકી છે. હજુ આ રેકેટમાં ભુવનેશને કામ આપનાર એક સગીર અને અન્ય આરોપીઓ સંડોવાયેલા છે જેની તપાસ ચાલી રહી છે. નિઃસંતાન દંપતી 1 મહિના સુધીની જ બાળક ખરીદવાનો આગ્રહ રાખે છે, કારણ કે એક મહિના સુધીનો બાળક હોય તો તે સમાજમાં પોતાના બાળક તરીકે બતાવી શકે છે. આ કેસમાં પણ જે નિઃસંતાન દંપતીએ બાળક ખરીદવા પૈસા આપ્યા હશે તેની સામે કાર્યવાહી કરાશે.’

હિન્દુસ્થાન સમાચાર / હર્ષ શાહ