- પાંચ દિવસના તહેવારો દરમિયાન 2,119 મુસાફરોએ વધારાની બસ સેવાનો લાભ લીધો.

જામનગર, 13 નવેમ્બર (હિ.સ.) : દિવાળીના તહેવારોમાં મુસાફરોની વધેલી ભીડને પહોંચી વળવા જામનગર એસ.ટી. ડિવિઝને તા. 4 થી 8 નવેમ્બર દરમિયાન 80 એક્સ્ટ્રા બસના ફેરા કર્યા હતા. આ પાંચ દિવસમાં કુલ 2,119 મુસાફરોએ મુસાફરી કરી હતી, જેના થકી એસ.ટી. વિભાગને 17,815.66 કિલોમીટરના સંચાલન સાથે કુલ રૂ. 4,88,935ની આવક થઈ હતી.

દિવાળીના તહેવારોમાં વતન જતા અને પરત ફરતા મુસાફરોની સંખ્યામાં મોટો વધારો થતો હોય છે, જેને ધ્યાનમાં રાખીને જામનગર એસ.ટી. ડિવિઝન દ્વારા ખાસ આયોજન હાથ ધરવામાં આવ્યું હતું. તા. 4 નવેમ્બરથી 8 નવેમ્બર સુધીના પાંચ દિવસના સમયગાળામાં વિભાગ દ્વારા કુલ 80 વધારાની બસો દોડાવવામાં આવી હતી. આ વિશેષ સંચાલન હેઠળ કુલ 2,119 મુસાફરોએ નિયત સ્થળોએ મુસાફરી કરી હતી અને એસ.ટી. વિભાગની તિજોરીમાં કુલ રૂ. 4,88,935ની આવક જમા થઈ હતી.

એસ.ટી. વિભાગના આંકડાકીય વિશ્લેષણ મુજબ, આ પાંચ દિવસ દરમિયાન વધારાની બસો દ્વારા કુલ 17,815.66 કિલોમીટરનું અંતર કાપવામાં આવ્યું હતું. સમગ્ર સંચાલન દરમિયાન વિભાગને સરેરાશ પ્રતિ કિલોમીટર રૂ. 27.44ની આવક પ્રાપ્ત થઈ હતી. તહેવારોના પ્રથમ દિવસે એટલે કે તા. 4 નવેમ્બરે એક બસના ફેરામાં 66 મુસાફરોનું પરિવહન થયું હતું અને રૂ. 26,700ની આવક નોંધાઈ હતી. ત્યારબાદ તા. 5 નવેમ્બરે ત્રણ બસના ફેરામાં 160 મુસાફરોએ મુસાફરી કરતા વિભાગને રૂ. 35,808ની આવક મળી હતી.

તહેવારોની રજાઓમાં તા. 6 નવેમ્બરના રોજ મુસાફરોનો સૌથી વધુ ધસારો જોવા મળ્યો હતો, જેના કારણે તે દિવસે સૌથી વધુ 12 એક્સ્ટ્રા બસના ફેરા દોડાવવા પડ્યા હતા. આ એક જ દિવસમાં 330 મુસાફરોએ એસ.ટી. બસની મુસાફરી કરી હતી અને વિભાગને રૂ. 80,786ની માતબર આવક થઈ હતી. તેવી જ રીતે, તા. 7 નવેમ્બરના રોજ 10 બસના ફેરા મારફતે 233 મુસાફરોનું પરિવહન કરવામાં આવ્યું હતું, જેનાથી રૂ. 43,278ની આવક ઉપાર્જિત થઈ હતી.

તહેવારોના અંતિમ તબક્કામાં તા. 8 નવેમ્બરના રોજ પણ 10 એક્સ્ટ્રા બસના ફેરાનું સંચાલન યથાવત રાખવામાં આવ્યું હતું, જેમાં 135 મુસાફરોએ મુસાફરી કરી હતી અને રૂ. 11,784ની આવક નોંધાઈ હતી. આમ, જામનગર એસ.ટી. ડિવિઝનના સમયસરના આયોજન અને 80 એક્સ્ટ્રા ફેરાના સંચાલનથી દિવાળીના તહેવારોમાં 2,119 મુસાફરોને પરિવહનની સુવિધા મળી હતી અને વિભાગને રૂ. 4.88 લાખથી વધુની આવક થઈ હતી.

---------------

હિન્દુસ્થાન સમાચાર / Dhaval Nilesh bhai bhatt