
ભાવનગર, 14 નવેમ્બર (હિ.સ.) ભાવનગર જિલ્લાના મહુવા માર્કેટિંગ યાર્ડ ખાતે લાભ પાંચમના પવિત્ર દિવસે સ્નેહમિલન કાર્યક્રમનું આયોજન કરવામાં આવ્યું હતું. મહુવા માર્કેટિંગ યાર્ડ દ્વારા યોજાયેલા આ કાર્યક્રમમાં મોટી સંખ્યામાં ખેડૂતો, વેપારીઓ અને યાર્ડના આગેવાનો ઉપસ્થિત રહ્યા હતા. કાર્યક્રમના માધ્યમથી સૌએ એકબીજાને નવા વર્ષની શુભેચ્છાઓ પાઠવી હતી.
લાભ પાંચમના અવસરે યોજાયેલા આ સ્નેહમિલનમાં ખેડૂતો, વેપારીઓ અને માર્કેટિંગ યાર્ડના આગેવાનો એક મંચ પર આવ્યા હતા. ખેતી અને વેપાર સાથે સંકળાયેલા લોકો વચ્ચે પરસ્પર સંવાદ અને સ્નેહભર્યા વાતાવરણમાં કાર્યક્રમ યોજાયો હતો.
આ પ્રસંગે મહુવા માર્કેટિંગ યાર્ડમાં ડુંગળી અને મગફળીની હરાજીનો પણ પ્રારંભ કરવામાં આવ્યો હતો. હરાજી શરૂ થતાં જ ખેડૂતો પોતાની જણસી લઈને યાર્ડ ખાતે પહોંચ્યા હતા. નવા વર્ષના પ્રારંભ બાદ જણસીની ખરીદ-વેચાણની કામગીરી શરૂ થતાં ખેડૂતો અને વેપારીઓમાં ઉત્સાહ જોવા મળ્યો હતો.
સ્નેહમિલન કાર્યક્રમ અને હરાજીના પ્રારંભને પગલે મહુવા માર્કેટિંગ યાર્ડમાં દિવસ દરમિયાન ખેડૂતો, વેપારીઓ અને અન્ય લોકોની અવરજવર જોવા મળી હતી. લાભ પાંચમના દિવસે પરંપરા મુજબ વેપાર-ધંધાની શરૂઆત સાથે યાર્ડમાં પણ નવા વર્ષની કામગીરીનો આરંભ થયો હતો.
હિન્દુસ્થાન સમાચાર / DISHANT NANDRAMBHAI GONADLIYA