અમરેલી જિલ્લાના રાજુલાના સમુહખેતી (ધુડીયા આગરીયા) મુકામે રાજ્યપાલએ વિદ્યાર્થીઓ અને ગ્રામજનો સાથે કર્યા યોગ અને પ્રાણાયામ
નિયમિત યોગાભ્યાસથી શરીર તંદુરસ્ત રહે છે, મન એકાગ્ર બને છે અને જીવનમાં સકારાત્મક ઊર્જાનો સંચાર થાય છે: રાજ્યપાલ આચાર્ય દેવવ્રત. અમરેલી, 18 નવેમ્બર (હિ.સ.) : રાજ્યપાલ આચાર્ય દેવવ્રતએ અમરેલી જિલ્લાના રાજુલાના સમુહખેતી (ધુડીયા આગરીયા) ગામ ખાતે રા
Governor performed yoga and pranayama with students and villagers at Rajula's collective farm (Dhudia Agariya) in Amreli district


- નિયમિત યોગાભ્યાસથી શરીર તંદુરસ્ત રહે છે, મન એકાગ્ર બને છે અને જીવનમાં સકારાત્મક ઊર્જાનો સંચાર થાય છે: રાજ્યપાલ આચાર્ય દેવવ્રત.

અમરેલી, 18 નવેમ્બર (હિ.સ.) : રાજ્યપાલ આચાર્ય દેવવ્રતએ અમરેલી જિલ્લાના રાજુલાના સમુહખેતી (ધુડીયા આગરીયા) ગામ ખાતે રાત્રિવિશ્રામ કર્યા બાદ ઊઘડતી ઉષાએ શાળાના વિદ્યાર્થીઓ, ગ્રામજનો તેમજ યુવાઓ સાથે યોગાભ્યાસ કર્યો હતો.

જિલ્લા પ્રભારી અને કૃષિ મંત્રી જીતુ વાઘાણી તથા સાવરકુંડલા ધારાસભ્ય મહેશ કસવાલા પણ આ યોગાભ્યાસ સત્રમાં જોડાયા હતા.

સમુહખેતી મુકામે પરોઢિયે યોજાયેલા યોગ સત્ર દરમિયાન રાજ્યપાલએ ઉપસ્થિત ગ્રામજનો, વિદ્યાર્થીઓ તથા શિક્ષકો સાથે વિવિધ યોગાસનો કર્યા હતા અને યોગના આરોગ્યલક્ષી ફાયદાઓ વિશે વિસ્તૃત માહિતી આપી હતી.

તેમણે જણાવ્યું હતું કે, નિયમિત યોગાભ્યાસથી શરીર તંદુરસ્ત રહે છે, મન એકાગ્ર બને છે અને જીવનમાં સકારાત્મક ઊર્જાનો સંચાર થાય છે. તેમણે વધુમાં ઉમેર્યું કે, યોગ એ ભારતની પ્રાચીન વિરાસત છે જેને વડાપ્રધાન નરેન્દ્ર મોદીએ વિશ્વવ્યાપી બનાવી છે. વ્યસ્ત જીવનશૈલીમાં યોગ અને પ્રાણાયામ સ્વસ્થ જીવન માટે અત્યંત જરૂરી છે. યોગ દ્વારા શરીર, મન અને આત્મા વચ્ચે સંતુલન સ્થાપિત થાય છે, જેના કારણે માનસિક તણાવ દૂર થાય છે અને અભ્યાસમાં પણ વધુ એકાગ્રતા પ્રાપ્ત થાય છે.

યોગ અભ્યાસ બાદ રાજ્યપાલએ પ્રાણાયામનો અભ્યાસ પણ કર્યો હતો અને સૌને નિયમિત પ્રાણાયામ કરવાનો અનુરોધ કર્યો હતો. તેમણે કપાલભાતિ, અનુલોમ-વિલોમ, ભસ્ત્રિકાના નિયમિત અભ્યાસથી શ્વસનતંત્ર મજબૂત બનતું હોવાની માહિતી આપી હતી. ઉપરાંત ઓમકારનું મહત્વ સમજાવ્યું હતું.

અંતે ઓમકારના ઉચ્ચારણ સાથે સમગ્ર યોગાભ્યાસને શાંતિપૂર્ણ રીતે વિરામ આપવામાં આવ્યો હતો.

રાજ્યપાલએ વિદ્યાર્થીઓ, વિદ્યાર્થિનીઓ દ્વારા કરવામાં આવેલી યોગ પ્રસ્તુતિને બિરદાવી હતી.

રાજ્યપાલએ યોગ અભ્યાસમાં સહભાગી થનારા સૌ ઉપસ્થિતોને નિરામય સ્વાસ્થ્ય માટે આર્શીવચન પાઠવ્યા હતા.

હિન્દુસ્થાન સમાચાર / હર્ષ શાહ


 rajesh pande