સામખિયાળી નજીક પ્લાસ્ટિકના દાણા ભરેલી ટ્રક આગની લપેટમાં: બે કલાકની જહેમત બાદ આગ પર કાબૂ
ડ્રાઈવરનો આબાદ બચાવ, ટ્રકની કેબિન બળીને ખાખ.- એક કલાકથી વધુ સમય હાઈવે પર વાહનવ્યવહાર ખોરવાયો. કચ્છ, 19 નવેમ્બર (હિ.સ.) : કચ્છના સામખિયાળી નજીક પ્લાસ્ટિકના દાણા ભરીને પસાર થઈ રહેલી એક ટ્રકમાં અચાનક આગ ફાટી નીકળતાં આસપાસના વિસ્તારમાં અફરાતફરીનો મા
સામખીયારી ખાતે ટ્રકમાં આગ લાગી


સામખીયારી ખાતે ટ્રકમાં આગ લાગી


સામખીયારી ખાતે ટ્રકમાં આગ લાગી


- ડ્રાઈવરનો આબાદ બચાવ, ટ્રકની કેબિન બળીને ખાખ.- એક કલાકથી વધુ સમય હાઈવે પર વાહનવ્યવહાર ખોરવાયો.

કચ્છ, 19 નવેમ્બર (હિ.સ.) : કચ્છના સામખિયાળી નજીક પ્લાસ્ટિકના દાણા ભરીને પસાર થઈ રહેલી એક ટ્રકમાં અચાનક આગ ફાટી નીકળતાં આસપાસના વિસ્તારમાં અફરાતફરીનો માહોલ સર્જાયો હતો. આગે જોતજોતામાં વિકરાળ સ્વરૂપ ધારણ કરતાં ટ્રકનો આગળનો ભાગ આગની લપેટમાં આવી ગયો હતો. ઘટનાને પગલે માર્ગ પરથી પસાર થતાં વાહનચાલકોમાં પણ ગભરાટ ફેલાયો હતો. જોકે, સમયસર ફાયર ટીમની કામગીરી અને ડ્રાઈવરની સાવચેતીના કારણે મોટી દુર્ઘટના ટળી હતી.

પ્રાપ્ત વિગતો અનુસાર, સામખિયાળી ગામ નજીકથી પસાર થતી પ્લાસ્ટિકના દાણા ભરેલી ટ્રકમાં અચાનક આગ લાગવાની ઘટના બની હતી. આગ લાગવાનું કારણ હજુ સ્પષ્ટ થયું નથી, પરંતુ આગની તીવ્રતા એટલી વધારે હતી કે થોડી જ વારમાં ટ્રકની કેબિન આગની ઝપેટમાં આવી ગઈ હતી. ઘટનાની જાણ થતાં ભચાઉ ફાયર વિભાગની ટીમ તાત્કાલિક ઘટનાસ્થળે દોડી આવી હતી અને આગ બુઝાવવાની કામગીરી શરૂ કરી હતી.

ફાયર ટીમ ઘટનાસ્થળે પહોંચી ત્યારે આગ વધુ વિકરાળ બની ચૂકી હતી અને જ્વાળાઓ ટ્રકની ડીઝલ ટાંકી સુધી પહોંચી ગઈ હતી. આવી સ્થિતિમાં આગને કાબૂમાં લેવી ફાયર જવાનો માટે મોટો પડકાર બની હતી. જો આગ ડીઝલની ટાંકી સુધી પ્રસરી હોત તો મોટી દુર્ઘટના સર્જાવાની આશંકા હતી. જોકે, ફાયર વિભાગના જવાનોએ સતત પાણીનો મારો ચલાવી આગને વધુ ફેલાતી અટકાવવા પ્રયાસો કર્યા હતા.

આગની ગંભીરતાને ધ્યાનમાં રાખીને ફાયર ટીમે બે કલાકથી વધુ સમય સુધી સતત કામગીરી હાથ ધરી હતી. અંતે ભારે જહેમત બાદ આગને સંપૂર્ણપણે કાબૂમાં લેવામાં સફળતા મળી હતી. ફાયર વિભાગની સમયસરની કામગીરીને કારણે ટ્રકમાં ભરેલા પ્લાસ્ટિકના દાણાના મોટા જથ્થાને આગની ઝપેટમાં આવતો બચાવી શકાયો હતો. જોકે, ટ્રકની કેબિન સંપૂર્ણપણે બળીને ખાખ થઈ ગઈ હતી.

બીજી તરફ, આગની ઘટનાને પગલે સલામતીના ભાગરૂપે માર્ગ પરનો વાહનવ્યવહાર એક કલાકથી વધુ સમય સુધી બંધ રાખવામાં આવ્યો હતો. જેના કારણે હાઈવે પરથી પસાર થતાં વાહનચાલકોને મુશ્કેલીનો સામનો કરવો પડ્યો હતો. સદનસીબે આ ઘટનામાં ટ્રકના ચાલકનો આબાદ બચાવ થયો હતો અને કોઈ જાનહાનિ નોંધાઈ નહોતી. ઘટનાની જાણ થતાં પોલીસ પણ સ્થળ પર પહોંચી હતી અને આગ લાગવા પાછળનું ચોક્કસ કારણ જાણવા તપાસના ચક્રો ગતિમાન કર્યા છે.

સામખિયાળી નજીક બનેલી આ ઘટનાએ ફરી એકવાર હાઈવે પર દોડતાં ભારે વાહનોની સુરક્ષા અને આગ જેવી આકસ્મિક પરિસ્થિતિમાં તાત્કાલિક બચાવ કામગીરીનું મહત્ત્વ ઉજાગર કર્યું છે.

---------------

હિન્દુસ્થાન સમાચાર / Rohit Ramjibhai Padhiyar


 rajesh pande